Nongpoh, Lber 16: Ka da long shisha ka sngi sah jingkynmaw bad ka jingkyrkhu ia ki paid riewngeit ka Balang Katholik ba hap ha ka Raid Madan Kyrdem ha Ri Bhoi District ha kaba ha kane ka sngi U Blei ka la ioh ban plie ia ka Mawkyrdep parish, kaba dei ka Parish ba thymmai ba la ai nam bad ai burom ha u Khrist u Syiem ka jingkyrmen Parish. Kane ka sngi ka dei ruh shi bynta ba Ka Balang Katholik Mawkyrdep ka la ioh ban pynkut ia ka jingrakhe ia ka jingdap 100 snem ka jingwan ka jingngeit (Centernary) ha kane ka Balang Shnong Mawkyrdep kaba la ioh pdaing ruh ia kane ka parish bat hymmai.
Kane ka parish kan kdup haduh 16 tylli ki Balang Shnong Katholik ba hap ha ka Raid Madan Kyrdem bad ka dei ka parish kaba 12 ha Ri Bhoi bad kan parish ba 46 ha ka jyllaniambah Shillong.
Ban pynphuh pynphieng bad ban ioh ia ka lehniam ka leh rukom kaba shongkun shong blei ha kane ka jingplie ia kane ka parish ba thymmai, u Most Rev. Archbishop Victor Lyngdoh, u la wan ban plie ia kane ka parish da kaba pynmynta da ka mass bakhuid bad ba la don ryngkat ruh u Bishop Synrop ka Jyllaniambah Shillong u Rev. Bernard Laloo, u Rev. Fr. Jameris Shylla, Chancellor ka Jyllaniambah Shillong bad u Rev. Father Pius Shadap, Vicar General ka Jyllaniambah Shillong ha ryngkat ka jigndon lang kiwei kiwei ki Lyngdoh Sohblei, ki Sister, ki broter, ki nongmihkhmat ka Ri Bhoi u Bah Sosthenes Sohtun myntri sorkar bad u MLA ka Jirang, u Bah Damanbait Lamare MLA ka Umroi, u Bah Isynei Hinge MDC ka Umroi, u Bah Kynjoh Rangtong MDC ka Mawahati lem bad ki riewneit na kylleng ki parish jong ka jyllaniambah shilong.
Ha kane ka sngi la pynphuh pynphieng ruh da jingiadon lang ki heprit kiba la ioh pdiang ia ka Communion bakhuid kaba dei ha ka sien kaba nyngkong ban sakhi ia kane ka jingplie ia kane ka parish ba thymmai.
Haba pynmynta ia ka mass bakhuid, u Most Rev. Victor Lyngdoh u la pynshai ruh ia ka jingmut ka Parish da kaba jubah ba ka parish ka dei ka Jaka jong u Blei kaba kdup lut ia baroh ki paid riewngeit na ka bynta ka jinglehniam, ki Sakrament, ka jaka duwai bad ka jingialap ia ka ktien u Blei bad na kane ka parish ki paid riewngeit kin ioh mad ia ki jingaiei na u Blei lyngba ki jingduwai bad ki jingleh riewblei bad pyndem ha khmat u Blei.
Nalor ba la pharia ia ka ktien u Blei ban sneng ban kraw ia ki hajar ki paid riewngeit u Most Rev. Victor Lyngdoh u la shim ruh ia ka bynta ba kongsan ban pynkhamti ia kane ka parish ba thymmai ha u Rev. Fr. Sebastian Kharwmawphlang kum u Parish Priest u ban long u nongsharai ba hakhlieh duh ia ki paid riewngeit kiba hap ha kane ka parish ba thymmai.
La pynkut ruh ia kane ka jingplie ia ka parish ba thymmai ha ka nohphai sngi da ka jingmane ia ka sacrament bakhuid tam ka duwan ba shim bynta da u Bishop Synrop u Rev. Bernard laloo ban pyndep ia ka niam ka rukom bad ruh bud sa ka cultural prokram bad ka jingpynkup burom ia ki Riewniam bad ki nongkitkam ki Balang shnong bad ia ki riew sbun mynsiem kiba la noh synniang ban pynphuh pynphieng ia kane ka sngi bad bud sa ka jingpynhiar lama ia ka jingrakhe shispah snem (Centenary) ka Balang Katholik Mawkyrdep da u Bishop Bernard laloo.
