Nongpoh, Jylliew 17: Ka ophis u District Sport Officer ka Ri Bhoi mynta ka sngi ka la pynhap pyrda noh ïa ka District Level Inter School Subroto Cup Football Tournament bad ki 6 tylli ki kynhun jong ki skul na Ri Bhoi ki ïa khun ïa ka phainal ban ïa knieh ïa ka nam lahduh na ka bynta ban ioh mihkhmat pat ïa ka District sha ka State Level.
Ïa kane ka Tournament la wan ban pynhap pyrda da u Assistant Director ka Directorate of Sports & Youth Affair, u Bah K Passah kum u kongsan bad u president ka RBDSA bah RB Shadap kum u Symbud kongsan bad sakhi lang ruh da ka jingdon lang u MLA ka Mawhati u Bah Charles Marngar bad kiwei ki riew rangbah.
Haka jingïakhun Final ka kynhun ki kynthei kiba hapoh ka 17 snem ka rta, ka Nongjri Presbyterian Secondary School ka la ïa khun pyrshah ïaka Christian Hr. Secondary School bad kane ka jingïaknieh ban rah ïaka nam lah duh ka long shisha kaba itynnad bad ha kaba kut kapor ka Nongjri ka la lah ban pynliem noh ïaka Christian da 1-0 kol.
Haka jingïakhun ïaka phainal ka kynhun ki shynrang kiba hapoh ka 15 snem ka rta, ka Mawtneng UP & Sec. School ka la pynliem noh ïa ka Mynken Christian Hr. Sec.School da 1-0 kol.
Ha kawei pat ka ingïakhun ïa knieh ban rah ïaka nam lahduh ki shynrang kiba hapoh ka 17 snem ka rta ka Nongjri Presbyterian Sec. School ka la ïakhun pyrshah ïaka Nehru Memorial Hr. Sec. School bad katei ka jingkhun ka la long shisha kaba ïa khait bad hakaba kut jong ka por 90 minit ka jingïakhait ka long mar shikol.
Ïa katei ka jingïakhun ki shynrang Under 17 la pynïalehkai noh daka jingïashut tie breaker bad dei ha lyngba kane ka jingïashut breaker ka Nongjri Presbyterian Sec. School ka la pynliem noh ïaka Nehru Memorial Hr. Sec. School.
Hadien ba la wai noh ka jingïalehkai, naka liang ka ophis u DSO Ri Bhoi ka sam ruh ïaki khusnam sha baroh ki skul ki ba kynthup naduh ki kynhun lahduh bad ki kynhun kiba la shah rem noh ha katei ka phainal bad kumjuh la sam ruh ïaki khunsam shimet bad naka liang ka ophis u DSO ka la pyntip ruh ba kitei ki skul kiba long kum ki lahduh kin ïoh ban leit mih khmat naka District sha ka State Level Inter School Subroto Cup ka ban sa long ha Nongbah Shillong.
