Nongpoh, Naitung 23: Hadien ka jingmad jingeh jong ki paidbah ha kaba ïadei bad ka jinglip khah khah bad ka jingbym thikna jong ka bording elektrik haka thaiñ Western Ri-Bhoi, u MLA ka Jirang u Bah Sosthenes Sohtun lem bad ka kynhun nongïalam jong ka Western Ri-Bhoi Dorbar & Social Welfare Organization hynnin ka sngi kila leit ban ïakynduh bad ki Myntri sorkar ka jylla ban ïakren halor kiba bun ki jingeh jong ki paidbah haka thaiñ Western Ri-Bhoi khamtam ka bording elektrik.
Haba kren sha ki lad pathai khubor mynta ka sngi, u Bah Sosthenes Sohtun MLA ka Jirang u la ong ba u MLA lem bad ki nongïalam ka Western Ri-Bhoi Dorbar & Social Welfare Organization kila leit ban ïakynduh bad u A.T Mondal Myntri ka tnad bording ka jylla ban ïakren halor ka jingeh jong ki paidbah ka thaiñ Western Ri Bhoi namar ka jingbym thikna jong ka bording kaba la buh jingeh shikatdei ïaki paidbah naduh ki skul pule, ki college, ki jaka sumar bad wat ki ophis sorkar, namar kumba long mynta ka bording kam ju thikna bad lada ka wan ruh ka tlot bha namar ka dei tang 11 KV ka bor jong ka, katba ka jingkit kala long kaba khia bad kum u MLA bad ka kynhun kila dawa na u myntri ban kyntiew bad pynheh noh ïaka bording ban sam sha ki paidbah ka thaiñ bad kum u myntri u la kular ban shimkhia bad ban pynsted ïaka kam.
Shuh shuh haka juh ka sngi naka liang u MLA bad ka kynhun kila leit ruh ban ïakynduh bad u Bah Prestone Tynsong ba dei u Symbud Myntri Rangbah bad Myntri ka tnad kam pohiing ka jylla ban ïakren halor ka jingdonkam ban pynurlong noh ïaka jingdon ki kali pynlip ding ne Fire & Emergency Service ha Patharkhmah kumba bun ki iing ki sem ki hap ban mad ïaka jingjia ba sngewsih tang namar ka jingbym don ki kali pynlip ding bad naka liang u Bah Prestone Tynsong u la pyntip ba kane ka kam kala don haka lynti ban urlong noh bad shen yn sa buh mawnongrim ban shna noh ïaka jaka treikam bad jaka ieng jong ki kali pynlip ding ha Patharkhmah.
Naka liang u Bah Eniasroy Rani President ka Western Ri-Bhoi Dorbar & Social Welfare Organization u la ong ba kum ki nongïalam kila pynpaw ka jingsngewkmen kaba khraw halor ka jingkular jong ki myntri sorkar ban pynurlong noh ïaka jingpynthikna ïaka bording elektrik ha ka thaiñ Western Ri-Bhoi bad kumjuh ruh ban buh noh ïaki kali pynlip kaba ka kam kala don ha lynti ban pynurlong, bad kane baroh ka dei ka jingshimkhia jong u MLA ban lum ban lang ïaka kynhun ki nongïalam shnong naka bynta ka jingbit jingbiang jong ki paidbah ka thaiñ bad kyrmen skhem ruh ba kum u MLA un dang lah ban trei bha bad ban wanrah ki kam pynroi haka thaiñ Jirang hi baroh kawei.
