Shillong, Naitung 22: Ka Sorkar lyngba ka tnat Animal Husbandry, ki pulit ka jylla bad ki shipai iada khappud Border Security Force (BSF) ki leh iala ka kamram ban tehlakam iaka jingkhaii mrad beain hapoh ka Jylla.
Ïa kane la ong da u Myntri ka tnat Animal Husbandry u Bah AL Hek haba jubab halor ka jingkylli baka Meghalaya ka sakhi iaka jingjur ka jingkhaii mrad beain khamtam sha Bangladesh lyngba ki thaiñ khappud.
Haba kren shaki lad pathai khubor u Bah Hek u la ong ba haduh mynta ka Jylla kam pat don iaki khyrdop talasi (Check Gate) Sorkar hynrei ka tnat Animal Husbandry ka don iaki sienjam ban pyntreikam ban khmih iaka koit ka khiah jong ki mrad ba wankit shapoh ka Jylla.
“Kadei ka kamram jong ka Sorkar ban tehlakam iaki kam khaïi beain bad ki bor Sorkar ki leh iala ka kamram naduh ki Doctor ka tnat Animal Husbandry, ki Pulit, BSF, ki Custom. Baroh ki leh iala ka kamram” la ong u Bah Hek.
U Bah Hek u la ong ba shen ka Meghalaya kan sa ioh iaki khyrdop talasi (Check Gate) Sorkar kata kawei ha Ri-bhoi District bad kawei ha Garo Hills.
U Myntri ula ong ba lada ki bor Sorkar ne ki BSF ki ioh kurup masi, kan dei ka kamram jong ki Deputy Commissioner (DC) jong kita ki district ban leh eiei iaki mrad (Masi).
U Bah Hek u la ong ba ki Deputy Commissioner (DC) kidei ki Chairman ban pyntreikam iaka ain Animal Cruelty Act jong ka Sorkar Pdeng ban shong bishar halor ki mrad (Masi) ba ioh kurup
