Shillong, Lber 12: Ka SOS Children’s Village Shillong kaba don ha Umiam, Ri Bhoi District, mynta ka sngi ka la pynlong ia ka Annual Day Celebration kaba itynnad bad kaba phuh ba phieng ha campus jong ka ha Umiam. Kane ka prokram ka long kum shi bynta ban rakhe ia ka jingkiew shaphrang bad ka jingroi jong ki khynnah kiba don hapoh kane jaka peit bad khmih ïaki khynnah bym don shuh ki nongsumar.
Ha kane ka sngi kyrpang la wan ban sakhi lang da u Wansakhiat Shabong, uba dei u District Child Protection Officer, ryngkat bad u Amarjyoti Sarmah, Director jong ka SOS Children’s Village Shillong, lem bad shibun ki riew rangbah shnong bad ki nongwan shim bynta kiba la wan ban kyrshan bad ai mynsiem ia ki khynnah.
Ka jingrakhe ia kane ka Annual Day ka la long kaba shongshit bad kaba pynkmen ha kaba ki khynnah ki la pyni ia la ki sap lyngba ki jait prokram bapher bapher kum ka jingshad, ka jingrwai bad kiwei pat ki jait jingrwai tem. Kane ka la ai lad ia ki khynnah ban pynpaw ia la ki sap bad ban pyni ia ka jinglah jong ki ha ka liang ka kolshor bad ka jingïalehkai.
Ha kaba kut jong ka prokram, ki nongpyniaid jong ka SOS Children’s Village Shillong ki la sam ruh da ki khusnam bad ki jingithuh sha ki khynnah kiba la leh bha ha ki jingiakop bapher bapher kiba la long ha ka District Level bad wat shabar ka district ruh. Kane ka jingsam khusnam ka long kum ka dak ka jingithuh bad ka jingpynshlur ia ki khynnah ba kin nang trei shitom bad kin dang kiew shaphrang ha ka pule puthi bad ha ka jingim.
