Ka sur u paidbah jong ka thaiñ Jirang mynta ka sngi kila pynlong da ka jingïaid paidbah ha ka thaiñ Patharkhmah ban dawa naka sorkar ba ka dei ban tuklar ban phah pynlait mardor ïa u Bah Bakstar Diengdoh u ba la shah kem haka tnad Forest jong ka Assam bad thmu ruh ban leit kynduh ïa u Sub Divisional Officer ka Patharkhmah Sub Division ban ai da ka jingthoh, hynrei ki paidbah kim lap ïa u SDO bad kumta kila rai ban tur sha ophis u Deputy Commissioner kaba don ha Nongpoh.
Kum ban shu kdew hangne, ka jingshah kem jong u Bah Bakstar Diengdoh ka dei hadien ba u la leit ban tam maw da ka kali lajong na kawei ka jaka kaba hap sha Assam, haka 10 tarik Jylliew, ba kum ka shnong kala pynlong ka jingtrei shnong ban maramot ïa u surok ha Belahari namar ka jingiehnoh beiñ jong ka sorkar Meghalaya bad ka jingsyrtok ki paidbah haka leit ka wan, hynrei utei u rangbah u la shah kem pynban ha u Range Forest Officer ka Loharghat, Kamrup West ha katei ka sngi bad la pynlait noh ïa u haka por 8 baje janmiet katba la bat pat ïaka kali jong u wat hadien ba ki paidbah, ki nongïalam shnong kila kyrpad ban pynlait noh ïaka kali.
Shuh shuh dei haka 3 tarik Naitung u Bah Backster u la shah phone ha kali pulit ka Assam bad kular ruh ban pynlait noh ïaka kali jong u, hynrei kaba sngew lyngngoh pat ka long ba utei u rangbah u long kumba leit ai doh namar ki pulit kila shet bad kem pynban ïa u bad mynta u don ha along ha Assam.
Dei halor katei ka Nongrim ki paidbah namar ka jingbym ioh kynduh bad u SDO ka Patharkhmah Civil Sub Division, mynta ka sngi naduh ki longkmie ki longkpa, ki rangbah shnong lem bad ki khynnah skul kila tur sha Nongpoh ban iaid rally sa ha khmat ka ophis u Deputy Commissioner ha Nongpoh bad naka liang ki nongïalam kila ioh ruh ban ïakynduh ïa u A Baranwal DC ka Ri-Bhoi ban ïakren halor katei ka kam bad naka liang u DC u la ai ka jingkular bad ban shimkhia ban pynlait ïa utei u rangbah lashai ka sngi.
Haba kren ha katei ka sngi naka liang u Bah Enias Roy Rani President ka Western Ri-Bhoi Dorbar, ki nongïalam sengbhalang naduh u Bah Receive Pator President ka KSU, Active Pator President ka RBYF, RC Thangkhiew President HYC jong ka Western Ri-Bhoi ki pynpaw ka jingpynrem ïaka sorkar Assam kaba la kem ïa utei u rangbah u ba shu leit ban tam maw na kawei ka jaka ban tei surok haka shnong Belahari bad kumba kong mynta ki paidbah kim tip ïa u pud u sam ba thikna, bad kane ka jingshah leh beiñ ki paidbah haka thaiñ khappud kam dei shuh ka sien ba nyngkong hynrei kiba ju jia naka por shaka por.
Hadien ka jingleit kynduh bad u DC kitei ki nongïalam kila pynpaw ka jingsngewhun hadien ba u DC u la kular ban shimkhia ïa katei ka kam bad kyrpad ruh ïaka sorkar ba ka dei ban shimkhia ïa katei ka kam ba u tei u rangbah un lait noh na along ki pulit ka Assam khlem shah teh kyndon bad lada u tei u rangbah um pat lait ha kine ki khyndiat sngi naka liang ki paidbah kila byrngem ruh ban tur biang sha Nongpoh.
