Nongpoh, Jylliew 29: Ka Shnong Erpakon ha Ri-Bhoi District mynta ka sngi kala pynkut noh ïaka ishu ha kaba ïadei bad ka jingbeh ïaki bar jylla na katei ka shnong, haka jingïalang kaba la long mynta ka sngi ha iing Dorbar ka shnong Erpakon hadien ba kum ka shnong kala pynmih da ka hukum ban beh lut ïaki bar jylla ha katei ka shnong naka jingshah pynïap jong u rangbah na katei ka shnong.
Kum ban shu kyrtiang dien halor ka rai bala pynmih da ka shnong Erpakon ka dei hadien ba uwei na u nongshong shnong ka Shnong Erpakon, u Kyrmen Lyngdoh Nonglait ha ka 11 tarik u Jymmang 2024, u la duh noh ïa la ka jingim, hadien ba u la shah tied shah bom da ka kynja lyntang ha uwei u nongtrei ka R.N Sharma Hotel ba la tip kum u Raju Rajbhar bad ïa une u nongtrei la kem noh da ki Pulit ka Ri Bhoi.
Haba kren sha ki lad pathai khubor naka liang u Bah M Thongni Rangbah Shnong bad u Bah Lambor Kharshilot Secretary, haka jingdon lang ki nongïalam shnong kila ong hadien ba ka shnong kala pynmih ïaka hukum haka 21 tarik Jymmang ban kyrpad ïaki bar jylla ba shong ba sah ha katei ka shnong khamtam kiba trei bylla ha RN Sharma Hotel ba ki dei ban mih noh mardor namar ka shnong kam don ka jingbah khlieh, naka liang ka shnong mynta ka sngi kala lum biang ïaka Dorbar Pyllun haka shnong Erpakon haka jingdon lang ruh ki trai ba aiwai ïaka RN Sharma Hotel.
Naka liang ka shnong kala pynpaw ruh ka jingsngew kmen ba katei ka jingïalang kala long kaba seisoh bad khylliap lama syndon ïaka ishu bar jylla, hadien ba ki bar jylla ba shongwai ha RN Sharma Hotel kila mih lut na katei ka shnong naduh ka 13 tarik Jylliew kumba la pyntip da ki trai jaka bad mynta ki don satang para khasi bad kum ka shnong kala ai khublei ruh naduh ki paidbah, ki kynhun seng bhalang kiba ai ka jingkyrshan ïaka shnong naduh ka Public Rally kaba la long ha katei ka shnong dang shen bad kyrmen skhem ba kum katei ka jingjia kan nym jia shuh haka shnong Erpakon bad ha ka jylla hi baroh kawei, kila bynrap.
