Ki runar kiba la kah dur bha, ki la ioh ban khung ia ka pisa ba la kot 4 lak tyngka hadien ka jingleit thombor ia kawei ka petrol pump jong ka Indian Oil lane ka Umran Fuel ha ka por 5 baje mynstep ha ka shnong Umran Niangbyrnai, Ri Bhoi District.
Ka khubor ba la iohlum, la iathuh, ba ki runar kiba la don kumba saw ngut eiei, ki la swait lypa ia katei ka petrol pump kaba don harud u surok bah NH-6 hashwa ba kin thombor ia ka karma sah u Manager bad ki nongtrei ha kane ka step phyrngap.
La iathuh ruh, ba ki runar kiba la ap tmang lypa ban ioh thombor, mar ia plie ka jingkhang ka ingsah u Manager katei ka petrol pump ki la kurup ia u bad ban teh ban khum ia u lem bad u wei u nongtrei ha kane ka jingialeh u manager u la mynsaw hadien ka jingshah mait da ki kynja tiar banep.
La ioh jingtip ruh, ba ki runar tang hadien ba ki la teh ia ki kti ki kjat jong u manager bad u nongtrei jong katei ka petrol pump, ki la knieh ia u shabi jong ka synduk pisa ba la buh ia ka pisa kaba la kot kumba 4, 24, 614 bad ban phet krad noh na kane ka jaka.
Na ka liang ki bor pulit ka Ri Bhoi District, mar ia ioh jingtip halor kane ka jingjia, marmar ki la leit ban pynlong ia ka jingtohkit ha katei ka petrol pump bad na ka liang u manager u la ujor ia ka ejehar ha Umsning police outpost bad ia la rejister mukotduma hapoh ka under309 (2) (6) BNS ha Umsning Police Station.
