Nongpoh, Nailur 2: Tang hadien kumba shi taiew tam na ka jingjia shah lute bad shah shoh shah dat jong u Manager bad ki nongtrei ka jaka thep umphniang ha Umran Niangbyrnai, kaba la tip kum ka Umran Fuels, ki bor pulit ka Ri Bhoi District hynnin ka sngi, ki la ioh ban kem noh ia lai ngut ki snar kiba donkti ha kane ka kam, kiba dei na ka jylla Nagaland.
Katkum ka kyrwoh ba la pyllait da u Superintendent of Police ka Ri Bhoi District, u Jagpal Singh Dhanoa, la iathuh ba kitei ki lai ngut kiba ngat ha ka ruh jong ki pulit, kidei kiba la tip kyrteng kum u Bokavi Zhimomi (25) na Vetenary Colony, Burma Camp, Dimapur, Nagaland; u Pashen Lam (32) na Urban Housing Block-II, Dimapur, Nagaland lem bad u Rokongulie Kepu (18) na Rail Bazar, H/No 12, Dimapur, Nagaland. Ha ka jingtohkit jong ki pulit, kitei ki lai ngut ki la phla halor ka jingdonkti halor katei ka kam.
Kumban shu kdew, ha ka step phyrngap jong ka 25 tarik u Nailar 2024, kumba saw ngut ki snar nonglute, kiba la wan lyngba ka Bolero ronglieh, ki la leit ban shoh ban dat ia u Manager bad nongtrei katei ka Umran Fuels bad lute ruh ia ka pisa kaba kot sha ka T. 4,24,614/- ryngkat bad lai tylli ki mobile phone.
U Jagpal Singh Dhanoa u la pyntip ruh sa uwei de uba donkti halor kane ka kam, la ioh ban kem noh da ki pulit ka Tuensang District jong ka jylla Nagaland, bad na ka ka liang ka kynhun jong ki pulit ka Ri Bhoi ki hiar ban leit shimti ia utei u runar ban wanrah tian bishar bad pynshitom katkum ki kyndon jong ka ain.
Ia kitei baroh saw ngut, la pyn ngat ha ki kyndon ain jong ka Umsning PS Case No. 12(06) 2024 U/S 309 (2) (6) BNS 2023 bad na ka liang ki pulit ki la pan por kumba 5 sngi lynter ban tohkit shwa ia kitei ki lai ngut kiba la ioh ban kem hynnin ka sngi na ka ingbishar jong ka District, katba ia utei uwei pat uba dang don ha kti jong ki pulit ka jylla Nagaland, yn sa wanrah tian bishar ha kine ki sngi kiban sa wan.
Halor kane ka jingjia, ki pulit ki la kurup ruh ia katei ka Bolero ronglieh kaba don ia u registration number NL07 CB 0156, kaba kitei ki saw ngut ki runar ki la pyndonkam ha katei ka jingleit ban lute, ban shoh ban dat utei u Manager bad nongtrei jong katei ka Umran Fuels.
