Ki runar bym lah ban ithuh durkhmat kila leit ban kyndang bad pynpait tala ïaka kamra buh Computer jong ka skul St. John’s Secondary School Jyntru bad rong tuh ïaki kor Computer, ki Projector ba pyndonkam naka bynta ban ai jinghikai ïaki khynnah skul.
Katkum ka khubor bala ioh lum katei ka jingjia la antad ba ka jia hynnin ka miet ha kaba la lap nyngkong da kawei ka longkmie ba pynkhuid ïa katei ka skul ha kaba ka la phone sha ki nonghikai ban pyntip ïa katei ka jingjia, hadien ba baroh ki kor komputer kim don shuh ha katei ka skul.
Naka liang ki bor pynïaid skul tang mar sien ioh jingtip halor katei ka jingjia kila pyntip sha ki pulit halor katei ka jingjia bad naka liang ki pulit ka Nongpoh Police Station mar mar kila leit ban pynlong ka jingtohkit ha katei ka skul bad lap ruh ba wat ka jaiñ pyrda ba kah ïa katei ka kamra ki runar kila rah lut bala suba ruh ba kila song ïa kitei ki tiar da ka jaiñ pyrda, nalor ka jingdon ki biri lyngkhot bad snep sikret ha katei ka kamra.
Haba kren sha ki lad pathai khubor naka liang ka kong Veronica Santi Warjri Principal ka St. John’s Secondary School Jyntru kala pynpaw ka jingsngewkhia kaba jur halor katei ka jingjia kaba ki runar kila shu dusmon ïaki tiar ki tiar ba pyndonkam ban ai jinghikai ïaki khynnah skul, bad kim don ka mynsiem ban pyrkhat ïaka lawei jong ki khynnah skul.
Kala ong ruh haba kheiñ kyllum ka jingduhnongg baroh kala poi kumba 3.56 lakh ba kynthup 5 tylli ki UPS, 6 tylli ki Monitor, 5 tylli ki CPU, u wei u Projector ryngkat ki Mouse ki Keyboard bad kiwei kiwei ki tiar.
Halor katei ka jingjia naka liang kum ki bor pynïaid skul kila ujor da ka ejahar bad kyrmen skhem ba ki pulit kin leh ïala ka kamram ban thwet bad kem ïa kitei ki runar ba donkti ha katei ka kam.
Peit ruh ha Youtube Channel:
