SHILLONG, NAITUNG 29: Uwei u samla pule klas 11 jong ka skul Jawahar Navodaya Vidyalaya, Mawphlang, ba la tip kyrteng u Nathaniel Sohtun u la duh noh iala ka jingim na ka jingshah bat bording ilektrik ha ka por ba u dang thmu ban leit sum hapoh ka hostel jong katei ka skul.
Kane ka jingjia kadei kaba la jia hynnin ka sngi ha kaba na ka liang ki bahaing ki la ioh jingtip nyngkong halor katei ka jingjia hadien ba ki bor pyniaid jong ka hostel katei ka skul ki la pyntip ba utei u khun u jongki u la shitom bad la pynkit sha Mawphang CHC.
Na ka liang kitei ki kmie kpa jong utei u khynnah ki la ioh ruh ban iakren bad ka Principal jong katei ka skul kaba la pyntip ba u Nathaniel u khlad namar ka jingshah bat bording ilektrik. Hynrei, na ka liang ki bahaing, kim lah satia ban ngeit ia katei ka jingkam, namar ki don ki dak mong ha ki bynta jong ka kti, ka dur bad ka kjat ruh, kumta ki la phah ban leh eksamin post-mortem ban lap ia ki jingshisha baroh shwa ba kin shim pat ia kiwei ki sienjam shakhmat.
