Nongpoh, Risaw 14: Ha ka thma pyrshah ia u drok, ki pulit Special Task Force jong ka nongbah Guwahati mynta ka step phyrngap jong ka 14 tarik u bnai Risaw 2024, ki la ioh ban kem noh ia uwei u snar nongkhaïi drok uba shyrkhei ryngkat bad u drok uba shongdor palat T. 4 klur tam.
Katkum ka tyllong khubor ba la iohlum, la iathuh ba ki pulit STF ka nongbah Guwahati hadien ka jingioh jngtip kaba thikna, ki la pynlong ia ka jingpynapshrip ha pyrshah jong ka North East Cancer Hospital ha Jorabat ha kaba ki la ioh ban bat ia kawei ka trok kaba don ia u registration number AS 01RC2336 kaba dang hiar sha ka nongbah Guwahati.
Ha ka jingtalasi ia katei ka trok, ki pulit ki la ioh ban kurup haduh 45 tylli ki synduk sabon kiba la thep ia utei u drok Heroin uba don ia ka jingkhia kaba 537.2 gram bad uba shongdor palat T. 4 klur ia uba la wanrah na ka jylla Nagaland ban pynpoi sha ka nongbah Guwahati.
Ha kaba iadei bad kane ka jingjia, ki pulit ki la kem noh ia utei u nongkhaïi drok ba shyrkhei, uba dei ruh u nongniah katei ka trok ia uba la tip kyrteng kum u Rananjay Mandal, 46 snem ka rta na ka shnong Bamunkuchi jong ka district Barpeta bad uba la sah mynta ha Bengali Basti jong ka nongbah Guwahati
