Ka Ri Bhoi College lyngba ka Entrepreneurship Development Centre mynta ka sngi ka la pynlong ia la prokram ai jinghikai kaba la tip kum ka Entrepreneurship Programme bad ka dei ruh ka prokram kaba neh san sngi kynthi ban hikai ia ki samla halor ki lad seng kam seng jam kaba dei lyngba ka jingkyrshan ka sorkar.
Ia kane ka prorkam la pynlong ha Conference Hall ka Ri Bhoi College, ha kaba u Block Development Officer ka Umling C&RD Block u Bah Erick Kevin Dkhar u la wan ban shim bynta kum u kongsan bad la sakhi lang ruh da ka jingdon lang u Principal u EC Benny, ki nonghikai bad ki samla pule lem bad ki samla ka dong Ri Bhoi.
Kumba la pypaw, kane ka prokram ka dei shi bynta ban ai jinghkai ia ki khun samla ha ki liang bapher bapher kiba ia dei bad ka sengkam seng jam la jong bad ruh ban ailad ia ki samla ba don sap ha ki kam bapher bapher, ba lyngba kane ka lad ai jinghikai kin lah ban ieng ha la ki jong ki kjat khamtam ha kum kane ka pyrthei kyrduh kam kyrduh jam.
Na ka liang u Erick Kevin Dkhar haba kren ha kane ka sngi u la bankhia halor ka jingkordor ki lad seng kam seng jam ban kyntiew ia ka ioh ka kot bad ruh kaba long kawei na ka lad ai kam ai jam ia kiba bun ki khun samla ha kane ka juk kyrduh kam kyrduh jam.
U la pynpaw ruh da kaba ong, ka jingdon kum kine ki prokram ban ai jinghikai halor ki lad seng kam seng jam, ka sorkar jylla ne ka sorkar kmie ka thaw ia ki lad ki lynti ban kyrsha ia ki samla bad kum ki samla ki dei ban shim kabu ban ioh ia ka jinghikai kiba bniah la ka dei ha kano kano ka rukom ba ki seng kam seng jam khnang ba kum ki khun samla kin lah ban ieng hala ki jong ki kjat da kaba seng kam seng jam lajong bad ym ban shaniah tang ha ki kam sorkar.
