Tang hapoh ka saw snem kata naduh u snem 2021 haduh u mynta u snem 2024 ka tnad Pulit na Ri Bhoi lyngba ka Anti Narcotic Task Force ki la ioh ban kurup drok haduh 5538.246 kg u Ganja bad 5702.78 grams u Drok Heroin.
Ia kane la pynpaw da u Additional Superintendent of Police ka Ri Bhoi u Bah Banraplang Jyrwa haba iathuh halor ka jingbteng ki bor Pulit ban ia khun pyrshah na ka jingkynrei u drok ha Ri Bhoi bad khatam ba ka Ri Bhoi ka dei ka khyrdop ka jylla bad ruh ba ka don ka surokbah National Highway-6.
Kumba la iathuh da u Bah Banraplang Jyrwa kum u heh ophisar ka Ri Bhoi, la ong ba katei ka jingioh kurup drok ki dei ki kaiphod jong u snem 2021 haduh u snem 2024. Ha u snem 2021 la ioh kurup 338.738 kg of ganja bad 476.4 grams u drok heroin, 2022 la ioh kurup 205.198 kg u ganja bad 3,098.75 grams u drok heroin, 2023 la ioh kurup 31.01 kg u ganja bad 1,965.03 grams u drok heroin bad ha u snem 2024 la ioh kurup 4,963.3 kg u ganja bad 162.6 grams u drok heroin.
U la pynpaw ruh kum ka tnad Pulit lyngba ka Anti Narcotic Task Force ka la dang bteng ban peitngor ia ka jingshalan beain ia u drok ha ka District bad ban ia khun pyrshah ia kane ka jingshalan tuh ne dih drok beain ka tnad Pulit ka la rai ruh ban lum lang ia ki Dorbar Shnong, ki Samla bad ruh wat ban pynkhlain ia ka Village Defence Party, namar tang ka tnad Pulit kam long kaba suk ban ia khun pyrshah ia une u drok bad la donkam ban iatrei lang na baroh ki liang, u la bynrap.
Na ka liang ka tnad Pulit ka la ai ia kitei ki jinglum jingtip ba bniah ka dei ruh hadien ba la leit ban kylli halor ka jingtreikam jong ka Anti Narcotic Task Force ha Ri Bhoi, kaba dei ruh hah kine ki sngi la mih bun ki kam tuh ki kam thim bad ki jingkyndang dukan ba bun ka jingkynnoh ka dei ki khynnah kiba la ngop ha ki jingdih drok.
Na ka liang u Additional SP ka Ri Bhoi, u Bah Banraplang Jyrwa, u la pyntip ruh ba ka tnad Pulit na Ri Bhoi kam shym la shong kli kti bad ka la ialeh katba lah ban tehlakam ia ka jingshalan tuh ia ki drok bad la dep ruh ban ujor mokotduma ia kito kiba la shah kem bad ha kane ka jingiakhun ban pynduh ia ka jingkynrei u drok la lap ba ka jingdon kti kam dei satia tang ki shynrang bad la don ruh ki riew kynthei kiba don kti ha kaba shalan tuh ia u drok ba ka tnad Pulit ka kyrpad na baroh ki nongshong shnong ka Ri Bhoi ban ai ia ka jingiatrei lang khnang ban lah ban tehlakam halor kane ka jingkynrei jong u drok, u la bynrap.
