Ki bor pulit ka East Jaintia Hills ha kine ki khyndiat sngi ba lah dep, ki la ioh tam ia kawei ka metiap kaba la sdang pyut ha ki bynta jong kawei ka khlaw dieng kwai kaba don marjan bad ka khappud Bangladesh, ia kaba la suba ba kadei metiap jong u wei na ki nongialam ka ri Bangladesh uba la wan phetrieh sha ka jylla Meghalaya hadien ka jingiakhih pyrshah ia ka thungkam thungjam hapoh katei ka ri ha kine ki khyndiat taiew kiba lah dep.
Utei u rangbah, ia uba la tip kyrteng kum u Ishaque Ali Khan Panna, udei u General Secretary jong ka Chhatra League bad ruh u nongialam ba paw jong ka Awami League ka ri Bangladesh na Pirojpur District, la iathuh ba u la khlad noh katba u dang pyrshang ban phetrieh sha ka jylla Meghalaya na ka jingsangeh treikam kynsan jong u klongsnam.
Kum ban shu kdew, da ki spah ngut ki nongkyrshan jong ka sorkar ka Myntri Rangbah barim ka ri Bangladesh, ka Sheik Hasina lem ki la shah pyniap ha ki paidbah kiba iakhih pyrshah, kat haduh ba katei ka Myntri Rangbah ruh ka hap ban hiar shuki mardor bad phet krad ialade sha India ban lait na ka jingshah thombor ha ki paidbah nongiakhih.
Ka tyllong ki khubor na ki pulit, ka la iathuh ruh ba ia katei ka met kaba la lap ryngkat ka Passport kaba don ia ka kyrteng jong utei u Ishaque Ali Khan Panna, la pynkit noh sha Khliehriat Civil Hospital na ka bynta pynlong shuh shuh ia ka jingtohkit.
