U Bah Paul Lyngdoh kum u myntri sorkar ba dei peit ia ka tnad ka kam jngohkai pyrthei ha ka jylla, mynta ka sngi u la ai ka jingkyrshan kaba pura ia ka Dorbar Shnong Mawsynram halor ka rai ban nym ai jingbit shuh ia ka jingleh niam hapoh ka krem Mawjymbuid kaba don ha Mawsynram.
Ia kane ka jingkyrshan, u Bah Paul u la pynpaw pyrthei mynta ka sngi haba kren sha ki lad pathai khubor.
Kum ban pynkynmaw, ka Dorbar Shnong Mawsynram ka la shim ia ka rai ba nangne shakhmatt kan nym ai jingbit shuh ia kano kano ka kynhun niam ban leit leh niam hapoh katei ka krem Mawjymbuin bad ki la shim ruh ia ka rai ba katei ka kam mawjymbuin kan long beit thik tang kum ka jaka jngohkai pyrthei bad ym ka jinglehniam jong kano kano ka kynhun niam.
Haba kren sha ki lad pathai khubor, u Bah Paul Lyngdoh u la ong ba ka jingleh ka Dorbar Shnong Mawsynram ka dei kaba bha tam bad kaba don jingmut ban khang ia kino kino ki kynhun ban leit leh niam hapoh katei ka krem Maw jymbuin, namar katei ka jaka kam dei ka jaka leh niam bad ka dei ka jaka jngohkai pyrthei ba ba ki briew kiba nabar ne na kylleng ki ri ki ju wan ban peitkai ia katei ka krem maw jymbuin.
“Kumba katei ka krem maw jymbuin ka dei ka jaka jngohkai pyrthei bad kam shym mut ban shu ailad ia kano kano ka kynhun ban wan lehniam, namar kane ka dei ka ri laitluid ha ka jingmane blei bad lada ailad ha kane ka jaka jngohkai pyrthei ban leit leh niam tang ia kano kano ka kynhun niam kan ktah pat ia kiwei kiwei ki kynhun niam bapher bapher hapoh ka jylla bad ka ri” ong u Bah Pual Lyngdoh.
Shuh shuh, haba kylli halor katei ka phang la ka shnong ka la wan neem sha ka sorkar ban pynpaw halor katei ka krem jymbuin ba kan long tang kum ka jaka jngohkai pyrthei bad ym ka jaka leh niam, u Bah Paul Lyngdoh u la pynpaw ba haduh mynta hi ka Dorbar shnong ka pat wan ai kano kano ka jingthoh bad haba kren shai halor katei ka krem maw jymbuin ka dei beit ban long tang kum ka jaka jngohkai pyrthei bad ka jaka leh niam jong kano kano ka kynhun, u la bynrap.
