Ki shipai iada khappud jong ka ri, ki Border Security Force jong ka 4th Battalion hynnin ka sngi, ki la ioh ban kurup haduh 64 tylli ki Masi kiba la thmu ban shalan beain sha ka ri Bangladesh lyngba ki khappud jong ka West Jaintia Hills District.
Katkum ka tyllong khubor ba la iohlum, la iathuh ba dei hadien ka jingioh jingtip kaba thikna ba ki shipai BSF ki la pynlong ia ka jingkhynra bad la lap ia kitei ki Masi kiba la pynrieh ha kawei ka khlaw kaba don marjan bad ka khappud Bangladesh.
Ia kitei ki Masi kiba la ioh ban kurup, ki bor jong ka BSF ki la aiti noh sha ki pulit ka West Jaintia Hills na ka bynta pynlong ia ka jingtohkit bad ban leh ia kiwei kiwei de ki jingdonkam katkum ki kyndon jong ka ain.
Shuh shuh, la iathuh ruh ba na ka liang ki shipai BSF, ki la ioh ruh ban kurup haduh 12 hajar kilo ka shini kaba thep ha ki lai tylli ki Bolero pickup, kaba la thmu ban shalan tuh sha ka ri Bangladesh lyngba ki khappud jong ka East Khasi Hills.
Kum ban shu kdew, lyngba ka jingpahara jur bad ka jingpeitngor miet la bad sngi, ki shipai BSF ki la ioh ban kurup palat 800 tylli ki Masi, 2310 ton ka shini, kiba la thmu ban shalan beain sha ka ri Bangladesh lyngba ki khappud ka jylla tang mynta u snem 2024.
