Ka Liverpool Football Club, ka la kiew ha ka kyrdan ba hakhlieh duh ha ka miej iakhein poin jong ka English Premier League, ha kaba ka jingioh ka Liverpool ban kiew hakhlieh duh jong ka miej iakhein poin, ka dei namar ba ka Manchester City bad Arsenal, ki la shah rem noh hakhmat ki kynhun ba ki iakhun pyrshah hynnin ka miet sngi Saitjain
Ha ka jingiakhun kaba hynnin ka miet, kaba la long ha Anfield ka madan ialehkai jong ka Liverpool, ha kaba ka Liperpool ka la lah ban pynliem noh ia ka Brighton da 2-1, kata lyngba ki kol ia kaba la thep da u Gody Gakpo ha ka minit ba 70 bad u Mohamed Salah uba la thep ha ka minit ba 72 jong ka kylla miet, katba ia ka kol na bynta ka Brighton la thep da u Ferdi Kadioglu ha ka minit ba 12 jong ka kylla step.
Kumba ka long mynta, ka Liverpool kaba don hakhlieh duh ka miej iakhein poin, ka don 25 poin ha kti, katba ka Manchester City kaba la shah rem noh hakhmat ka Bournemouth da 2-1 bad ka Arsenal ka la shah rem noh da 1-0 hakhmat ka Newcastle.
Ka Manchester City kaba don ha ka kyrdan ba-ar ha ka miej iakhein poin ka don 23 poin, bud sa ka Nottingham Forest 19 poin bad ka Arsenal ha ka kyrdan ba saw kaba don 18 point.
