Ka Dorbar Shnong Umsawnongkharai mynta ka sngi kum ka jingsarong ia ki ar ngut ki samla na ka shnong ki la ai kata ka jingkyrshan bad ka jingkitbok kitwiang shuwa ba kin leit ban shim bynta sha ka IFMA Muay Thai Championship ka ban long naduh ka 11 tarik u Nailur 2024 haduh ka 21 tarik u Nailur 2024 ha ka ri Thailand.
Kine ki ar ngut ki samla kin ban leit aireng bad ban mihkhmat ia ka ri India na ka shnong Umsawnongkharai ki kynthup ia ka Dasngewtngen Nongrum bad ka samla Ailin Grace Kharbangar.
Ha kane ka jingiakynduh lang ban ai ka jingkitbok kitrwiang ia kine ki 2 ngut ki samla ka shnong la don ryngkat da u Bah A.Sun, Rangbah Shnong, u Bah Tony Shylla, Secretary Shnong bad kynthup kiwei kiwei ki dkhot nongialam Shnong.
Kum ka jngai mynsiem bad ka jingpynshlur ia kine ki samla, na ka liang ka shnong nalor ka jingkitbok kitrwiang bad ka jingai mynsiem ka Shnong ka la synniang ruh da ka song pisa shi bynta ban kyrshan lem ia kine ki samla kiba hap ban leit mihkhmat sha katei ka lympung ha ka ri Thailand.
Na ka liang u Bah Tony Shylla kum u Secretary Shnong u la ai jingkren ban sneng ban kraw ia kine ki samla ha ryngkat ka jingai mynsiem ba kin leit ban shim bynta naduh ka mynsiem na ka bynta ban ioh khur ia ka nam jop, kaba long ka nam bad ka burom ia ka shnong bad kumjuh ia ka ri bad ka jaid bynriew.
Shuh shuh, u la kyntu ruh ia kiwei ki samla ka shnong ba kin bud ia ka nuksa ba bha jong kine ki samla kiba don ia kata ka thong ban kiew shaphrang ha ka jingim bad kampher la ka long ha kano kano ka sap ba la ai kyrpang u Blei lada mih kita ki khun samla kan long shisha ka nam bad ka burom ia ka shnong ka thaw.
