Tang shi sngi hadien ba ka sorkar Assam ka la kyndang naphang ia ki dukan bad ki ïing ba wan shong ne sah beain da ki bar jylla ha ki jaka sorkar ba hap harud surok National Highway-6 ha 15mer, Byrnihat ba hap ha u pud u sam ka jylla Assam bad mynta ka sngi la lap bad iohi ba ki bar jylla ki la wan tur bad wan buh dukan noh sha ka liang u pud u sam ka Meghalaya ba hap ha ka Shnong 15mer, kaba dei hadien ba ki la shah beh na u pud u sam ba don sha shiliang ka Assam.
Halor kane ka jingwan buh dukan kitei ki bar jylla sha u pud u sam ka shnong 15mer ba hap ha Ri Bhoi District ha ka jylla Meghalaya, ki nongialam ka FKJGP ba la ialam da u Samla Kitborlang Suting, Organising Secretary ka FKJGP Byrnihat Circle, bad la synran lang da u Bah Lumlang Mawnai, Vice-president ka FKJGP NKHD lem bad ki dkhot ka FKJGP 15mer Unit ki la leit ban khang bad maham syndon ba kim dei ban buh dukan ha katei ka jaka ba hap ha u pud u sam ka Meghalaya.
Na ka liang u Samla Kitborlang Suting kum u nongialam ka FKJGP Byrnihat Circle u la ong ba ka seng kan nym ailad ba kitei ki briew kiba shongbeain kin wan sah ne buh dukan sha u pud u sam ka Meghalaya bad kane ka jingthmu jongki ban wan riehtngen noh sha Meghalaya, ka dei hadien ba ia ki dukan bad ki ïing ki sem jongki la kyndang naphang da ka sorkar Assam halor ka jingwan shong ne sah beain ha ki jaka sorkar.
Shuh shuh, u la bynrap ruh da kaba ong, ba ka seng FKJGP kan dang pynlong ia ka jingpeitngor nangne shakhmat bad lada ka lap ba kitei ki briew ba la shah pynpra dukan bad ki ïing ki sem kin wan rung sha ki shnong ba hap ha Meghalaya kum ka seng kan nym ailad satia bad ha kajiuh ka por ka la kyrpad ruh ia ki bor shnong, ki seng samla shnong bad ki paidbah ban ia trei lang khnang ban lah ban iada na kane ka jingthmu wan ruh tuh kitei ki bar jylla sha ki shnong Meghalaya hadien ba ki la shah kyndang naphang ha ka sorkar Assam, u labynrap.
