Khliehriat, Jylliew 03: Ban dawa ne pynbor ia ka sorkar jylla bad wat ia ka sorkar pdeng ban plie noh ia ka kam tih dewiong ha Rilum Jaintia ba la ktah jur palat ia ki paidbah na ka jingkhang ban tih dewiong, u Bah Marshal SB Biam kum u President ka Jaintia Coal Owners, Miners, Suppliers and Workers Association u la dang bteng haduh mynta ka sngi ia ka jingshah thngan kaba la kot mynta la 3 sngi kynthih ha East Jaintia.
U Bah Marshal SB Biam u la sdang ban shah thngan nyngkong ha ka 1 tarik u Jylliew ha phyllaw ka ophis u Deputy Commissioner ka East Jaintia Hills, hynrei la hap ban pynkynriah noh iaka jaka shah thngan sha Rymbai Road, Lad Rymbai Dongwah, kaba deina ka daw ba um pat ioh jingbit ban shah thngan ha phyllaw ka ophis u Deputy Commissioner.
Haba kren sha ki lad pathai khubor mynta ka sngi, u Bah Marshall SB Biam u la ong ba haduh mynta ba la dap 3 sngi ka jingshah thngan ka met ka phad jong u ka dang biang bad mynta la kot 52 kynta ka jingshah thngan kaba u iakhun ban dawa ia ka jingdonakam ban ailad noh ban tih dewiong ha rilum Jaintia.
Kumba long haduh mynta ka sngi, ia kane ka jingshah thngan u Bah Biam la wan ai mynsiem da ki longkmie, ki rangbah, ki seng bhalang bad ki nongialam shnong bad dei ha ka por 2.30 ba ki bor synshar District bad ki Magistrate ki la wan pei wan peit wan khmih ia ka ka koit ka khiah u Bah Biam bad u la kyntait ban leit sha ki Doctor halor katei ka jingbthah ki bor district.
U la ong ruh katba ym pat plie ia ka jingtih dewiong un dang bteng ka jingshah thngan bad haduh mynta um pat nud ban ong ei ei halor kane ka phang, namar kam pat don kano kano ka jingiakren bad ka sorkar.
Ha kawei pat ka liang, u General Secretary jong kane ka seng u Bah Khrawbor Ryngkhlem u ong ba ki sengbhalang kiba pher kibapher ruh ki la wan ban ai mynsiem ïa ki kum ka seng kynthup nadudh u President jong ka Hima Sutnga, ka HNYF , President jong ka seng VPP EJHD u bah Damewanhi L Rymbai bad kiwei kiwei de ki sengbhalang bad ki riewshimet.
Ka seng ha kajuh ka por ka la ai khublei kyrpang ruh ïa u Waheh Shnong ka Shnong Ladrymbai Dongwah ba u la kloi ban buh ruh da ki volunteers ban synran ha kane ka jingïakhih.
Ki paidbah ruh ki la nang tuid ban wan ban ai mynsiem ïa u bah Marshall katta naduh u General Secretary ka seng JSM u bah Roitre Dkhar , President ka JNC Ladrymbai Circle bad kiwei de.
Sa peit ruh
