Ka Meghalaya Police (MPL) ka Jylla ha ka sngi Balang ka la pyllong ia ka jingiathir na bynta kumno ban tehlakam bad ban rat dkhong ia ka kam shalan ia ki kynthei ha ki kam pynbrai.
Haba kren ha kane ka sngi, u Symbud Myntri Rangbah ka Jylla uba khmih iaka tnat Home (Police) u Bah Prestone Tynsong u la ong ba kane ka kam ka dei kaba jia ha kylleng ka pyrthei bad ka la nang jur man ka sngi bad ka la long ka jingeh ha ka kylleng ka pyrthei.
U Bah Prestone ula ong ba ka jingpyllong ia kane ka jingiathir kana ai jingmyntoi shibun khnang ba ka Sorkar Jylla ruh kan ioh ia ka jingai jingmut jong ki halor kumno ban pynbha bad ban pynkhlain ia ki ain ban tehlakam ia kane ka kam.
Ula ong ba ka Sorkar ka don ka jingthmu bad kut jingmut ban pynduh ia kane ka kam runar kaba shyrkhei bad ula kyntu ia ki stad, ki riew shemphang ban ai ki jingai jingmut sha ka sorkar khnang ba leh ia kaba donkam.
U Symbud Myntri Rangbah ula ai nuksa ba haba don ki kynhun kiba pyniaid beain ia ka kam khaii met bad lada ki pulit ki pynngat ia ki ha ka ain ka shem jingeh namar ba lada ki poi sha ka iing bishar, ki sakhi kim pat biang namar kata ban pynbeit ia kane ka jingeh donkam ban pynkhlain ia ka ain la ka long ka ain Sorkar Jylla ne ka ain Sorkar Pdeng.
Naka liang ka Myntri ka tnad kam ain ka Kong Ampareen Lyngdoh ka la ong ba ki kynthei bad ki shynrang ki dei ban iawan lang shakhmat ban ialeh pyrshah ia kane ka kam runar kaba shyrkhei.
Ka Kong Ampareen ka la ong ba ka ain kam dei ban shu don kumta hynrei dei ban pyntina ba ka ain kan treikam bad ai ia ka jingbishar ba hok.
