Ka Khun Hynniewtrep National Awakening Movement (KHNAM) hynne ka sngi, kala sdang iaka jingiakhih daka ba shong kyllain mungor.
Kane ka jingiakhih bala pynlong ha Madan Malki ka dei ban dawa na ka Sorkar Jylla ban pynduh pyndam noh ia ka Personal Interview naka bynta ki kam Sorkar jong ka Grade B, C, D.
“Kumba ngi la pynbna kane ka jingiakhih ka dei ban dawa na ka Sorkar Jylla ban pynduh noh iaka Personal Interview” la ong Working President ka KHNAM u Bah Thomas Passah.
U Bah Thomas Passah ula ong ba kane kam dei ka sien ba nyngkong hynrei naduh ka Sorkar MDA I, ka KHNAM ka la ju iai dawa na ka Sorkar Jylla ban pynduh noh iaka Personal Interview.
U Bah Thomas ula ong ba ka KHNAM na ka por sha ka por kala thoh shaka Sorkar Jylla ban pynduh noh iaka Personal Interview khnang ban pynthikna baka thungkam thungjam ka long kaba khuid ba suba.
“Balei ki 36 ngut ki MLA ka ri Khasi Jaintia kim kren halor kane ka phang kaba kongsan na ka bynta ki khun samla ha ka liang ka iohkam iohjam da ka rukom kaba khuid, ka jingbym mih jong kine ki MLA ka paw ba ma ki ruh ki donkti ban pynjaboh ia ka rukom thungkam thungjam ha ka jylla Meghalaya”, kynthoh u Bah Thomas.
