Shillong, Risaw 17: Ban pynmih ia ki lad ki lynti kiba kham tyngeh ban rad dyngkhong ia ka jingkynrei u drug ha nongbah Shillong, mynta ka sngi u Deputy Chief Executive Member ka Khasi Hills Autonomous District Council u Bah PN Syiem, ba dei peit ia ka tnad Elaka, u la lum ia ki Rangbah Shnong jong ka Nongbah Shillong ban ia mir ia thir halor kane ka mat.
La wan ban shimbynta ha kane ka jingialang ia mir jingmut da ki Rangbah Shnong na ki Shnong bapher bapher, ki nongialam ka Synjuk Nongsynshar Shnong, ki riew rangbah bad kiwei kiwei.
U Bah PN Syiem haba kren bad ki Nongthoh Khubor, u la iathuh, ba kum u nongialam paidbah u don ia ka jingkitkhlieh ban wad ia ki lad ki lynti ban weng ia ka jingkynrei kaba sted jong u drug hapoh Nongbah Shillong kaba la ktah shikatdei ia kiba bun ki longiing longsem.
U la iathuh ruh, ba lyngba kane ka jingialang la ioh ban ia mir jingmut sani kumno ban iakhun ia kane ka jingsniew u drug bad kaba kongsan hi ka dei ka jingiatreilang jong ki nongialam shnong ki Seng Samla bad kiwei kiwei ki kynhun ban iakhun ia ka thma drug bad la kyrpad ruh ia kino kino ki Dorbar Shnong kiba don kano kano ka jingmut halor kane ka mat ki lah ban phah sha ka District Council hapoh ka shitaiew
U Bah Syiem u la iathuh ruh, ba ka Council hadien ka jingmynjur jong u Lat ka jylla yn sa pyntreikam noh ia ka Administration of Elaka Amendment Bill kaba dei ka ain ia kaba ka Council ka dang ialeh ban thaw ia ki rules shwa ban pynbna paidbah, ha kaba lyngba kane ka bill kan don ka Vigilance Committee kaban peitngor ha ka jingiatreilang bad ki bor ka ain ha ka jingiakhun pyrshah drug bad ia ki nongkhaii bad nongdih drug la ka jong.
