Kum shi bynta ban tehlakam ia kino kino ki Kali paidbah ne ki Kali ki riewshimet kiba ju pynkhein ain bad kiba ym ju bud ia ki kyndon ain niah Kali, ki Pulit ka Nongpoh Police Station lyngba ka Traffic Branch mynta ka sngi u Blei ki la pynlong ia ka jingtalasi ia ki Kali paidbah kiba iaid ba ieng lyngba ka surokbah National Highway-6 ha Ri Bhoi Distsrict.
Ia kane ka jingtalasi ia ki Kali la pynlong ha Quinine, ha kaba ki pulit na ka Traffic Branch jong ka Nongpoh Police Station ki la pynlong ia ka jingtalasi ha katei jaka naduh ki kali ar shaka bad kiwei kiwei ki Kali paidbah bad kynthup ruh ki Kali tourist kiba wan na shabar ka jylla.
Kane ka jingbteng ki Pulit traffic ban talasi ia ki Kali paidbah, ka dei ruh halor ka jingdon jong bun ki kali ar shaka bad kiwei ki kali paidbah kiba ju pynkhein ain bad kiba ym ju bud satia ia ki kyndon niah kali, ha kaba na ka liang ki bor pulit ka traffic branch ki la ai ka jingpynsngewthuh ba ka long kaba donkam ba ki hap ban bud ia ki kyndon niah kali na ka bynta ka jingshngain jongki.
Ha kane ka jingtalasi ia ki Kali paidbah, bun na ki Kali kiba pynkhein ain ki la shah bat ha ki Pulit bad la ai ruh ka jingmaham ba kim dei ban pynkhein ain bad lada dang lap nangne shakhmat kin sa shah pynshitom beit katkum ki kyndon ain ba dei ban leh katkum ka Motor vehicle act.
Kumba la pynpaw da ki Pulit, la ong ruh ba kane ka jingpynlong ban talasi ai ki Kali naduh ki kali ar shaka, bad kiwei kiwei ki kali paidbah, ka dei halor ka thong ban pysngewthuh ia ka jingdonkam ban bud ia ki kyndon ain niah kali, khatam ba ki hap ban deng ia ki seat belt, ka helmet bad ruh ban pynbiang ia ki kot ki sla bad kino kino kiba pynkhein ia kitei ki kyndon ka la long beain bad kin sa shah pynhap katkum ki kyndon ain.
Shuh shuh, la ong ruh ba ki bor pulit mynta ka sngi ki la ai ka jingmaham ia baroh ki Kali ba kim dei ban pynkhein ain bad lada ki pynkhein ain nangne shakhmat kin nym lait na ki kyndon jong ka ain, bad la leh ruh ia kane ban telakam ia ka rukom niah kali ka long ban iada bad ban nym mih kino kino ki jingjia ba sngewsih kaba dei tang na ka daw ka jingpynkhein ain niah kali, ong ka tyllong khubor na ki Pulit ka Ri Bhoi.
