U Myntri Rangbah ka Jylla u Conrad K Sangma hynne ka sngi u la pynbna ba ka Sorkar kan thung ia ki nongshong shnong kum ki ‘Tourist Assistant’ ha ka rukom ba la buh kyrdan.
Ki ‘Tourist Assistant’ kin dei ki briew kiba phong jain shi rong kin long kum ki nongpyniaid ia ki nongjngohkai pyrthei, kin ai ka jingpahara, bad kin ai jingtip ia ki nongjngohkai pyrthei.
“Ka thong ka long ban pynlong ïa ki nongwan jngohkai pyrthei ban sngewshngaiñ bad ban pynthikna ba kin ïoh ïa ki jingtip kiba thikna” la ong u Conrad.
U Myntri Rangbah ula ong baka jingthung iaki ‘Tourist Assistant’ kadei ka jingthmu ban ai kam ruh ia ki samla trai ri.
Haba pynpaw iaki jingjia ba dang shen iaki kali kit nongwan shangkai, u Conrad “Ngi dei ban ïatreilang ban pynrem ïa kum kine ki jingjia bad ban kyntiew ïa ka jinglong kaba bha na ka bynta ka kam jngohkai pyrthei”.
“Ngi pynïasoh ïa ki nongïalam shnong, ki sengbhalang, bad ki kynhun ha ki jingïakren jong ngi ban kyntiew ïa ka kam jngohkai pyrthei ha ka jylla. Ha kine ki hynriew snem ba la dep, ka Sorkar ka la wanrah ïa ki kam jngohkai pyrthei bapher bapher ban kyntiew kyrdan ïa ka Meghalaya” u la bynrap.
U Conrad ula kyntu ia ki nongshim bynta ban ai jingmut na ka bynta ban pynroi shuh shuh ia ka rukom jngohkai pyrthei bad ula ong “Ka jingthmu jong ngi kam dei tang ban pynbun ïa ki nongwan jngohkai pyrthei hynrei ban thaw ruh ïa ki jingleit jngohkai bad ki jingïaid lynti kiba kyrpang kiba pynbha ïa ka jingïakynduh jong ki”.
Ha kane ka sngi u Myntri Rangbah ka jylla u Conrad K Sangma bad u Myntri ka tnat kam jngoh kai pyrthei u Bah Paul Lyngdoh ki la plie paidbah ruh ia ka Calendar jong ka Autumn Tourism Calendar.
Ka Shillong Literary Festival kan long naduh 12-14 Naiwieng, ka Shillong Cherry Blossom Festival ha ka 15-16 Naiwieng, ka Me’gong Festival ha ka 29-30 Naiwieng, The Hills Festival ha ka 6-7 Nohprah, bad u Bryan Adam un wan tem ha Shillong ha 10 Nohprah bad ka Winter Takes ha ka 12-14 Nohprah.
.
