Ki khynnah skul ka Raid Shabong Border Area govt Sec School ki la ioh rah ia ka nam lahduh ha ka jingiakob ha ka Cluster Round jong ka lympung iakob National STEM Challenge.
Ia kane ka lympung la pynlong da ka Brillio ryngkat ka jingiatreilang bad ka STEM Learning, kaba long ka shlem treikam kaba iarap ban wanrah ki lad ki lynti ban weng ia ki jingeh ba mad da ka imlang sahlang kaba la trei tyngeh ban kyntiew ia ka jingai jinghikai jong ka STEM hapdeng ki khynnah skul.
Ia ka wat jingiakhun jong ka cluster round, la pynlong ha Lumparing Vidyapeeth, Shillong, ha kane ka sngi la pynlong ruh ia ka jingpynkup burom ia kine ki khynnah skul da ka kynhun jong ka STEM Learning bad ki nonghikai.
Kine ki nongjop mynta kin lah ban jam shuh sa sha kawei pat ka wat jong ka jingiabokob bad kata ka long ka Zonal round, da kaba buh ia ka thong ha khmat bad kata ka long ban iakob na ka bynta ka wat jong ka Phainal ha Bengaluru.
Ka Drishti Thapa ka khynnah skul jong ka Lumparing Vidyapith Secondary School Shillong kala ong “Ka jingiaid lynti ha ka jingiashim bynta ha ka jingiakob ia ka National STEM Challenge ka la long kaba sngewtynnad na ka bynta jong I bad ki paralok jong ka.
Ka la pyni ia ki ba kam don kawei ruh ka jingangnud ne ka jingphohsniew kaba heh ne ka bym lah ha kaba iadei bad ka jingwanrah ia ki lad ki lynti kiban iarap ban weng ia ki jingeh ba ka pyrthei ka iakynduh.
Kane ka jingiakob ym tang ba ka pyniar ia ka jingmut jingpyrkhat hynrei ka la pynkhih ia ka mynsiem ban don ka jingangnud ban wad ia ki lad bad ki buit thymmai bad kumjuh ruh ha ka pule puthi ha ryngkat ka sap bad kumjuh ruh ka jingtip bad la ioh, ngi sngew ngi la long kiba la pynkhreh ban leh eiei bad noh synniang na ka bynta ka pyrthei-da ka jingstad science bad technology.”
