Uwei na u Samla na ka dong Ri Bhoi bad uba dei na ka shnong Umdapdumu, u samla Albert Maring u la pynpaw ia ka jingsngewkhia halor ka jingma na ka jingkynrei u drok bad kum u samla u la kyntu ia ka sorkar ba kan ia thir sani ia ki lad ki lynti kumno ban iakhun pyrshah na ka jingkynrei jong u drok.
Haba kren sha ki lad pathai khubor, u Samla Albert Maring u la ong ba kum u samla u hap ban kren halor kane ka phang ne ka mat ba kongsan bha, namar ka jingkynrei jong u drok ka long kaba shyrkhei bad ba u drok u la rung ruh wat sha ki Shnong nongkyndong.
“Kiba bun ki samla ki la ngat ha une u jingdih basniew kan jia aiu ia ka lawei ka jaid bynriew bad dei halor kane ka Nongrim la donkam ba ka sorkar kan shim khia bad ia thir sani ha kane ka Dorbar Synrai na ka bynta ban shim ia ki lad ki lynti khamtam ban ia khun pyrshah na ka jingkynrei jong u Drok” ong u samla Albert Maring.
U la ong ruh haba ia khun pyrshah ia u drok ka sorkar ka la donkam ruh ban buh noh kita ki jaka ai jinghikai (Rehabilitation cetnre) na ka bynta kito ki samla ba la ngop ha u drok ha man la ki District bad da ka jingdon kine ki jaka ai jinghikai kan iarap ruh ban pynduna ia kito ki samla ban ngop ha une u jingdih ba sniew.
Shuh shuh, u la pynpaw ruh haba ong ban ia khun pyrshah ia ka jingkynrei u drok, ka jingkitkhlieh kam dei shuh tang ka sorkar ba kan shim ia kita ki lad ki lynti ban pynduhjiaid ia u drok, hynrei ban khanglad na ka jingkynrei u drok la donkam ban ia trei lang naduh ki nongmihkhmat paidbah, ki nongialam niam, ki nongialam sengtrei mon sngewbha, ki nongialam shnong bad kum ki paidbah nongshnong shnong ka jylla hi baroh kawei, u la bynrap.
