Ka kynhun ki Local Truck Owners and Drivers Association hynne ka sngi kila pyntip ba ki kali kiba kit maw kit shyiap hapoh ka jylla, ki lah ban kamai khlem ka Challan.
Ia kane la pyntip da u President ka kynhun u Bah Egenstar Kurkalang hadien ka jingiakynduh ia Myntri Rangbah ka Jylla u Conrad K Sangma ha ka sngi Palei jong ka taiew.
Haba kren sha ki lad pathai khubor u Bah Egenstar ula ong ba ha ka jingiakynduh ia u Myntri Rangbah, ka kynhun ka la aiti ruh ia ki Dorkhas ban kyrpad ban pyllait iaki kali kit maw bad shyiap na ki katto katne ki kyndon jong ka MMMCR Act.
“Katba ka sorkar kan dang pynkhreh ban wanrah ia ka jingpynkylla ha kaba ia dei bad ka Meghalaya Minor Minerals Concession Rule (MMMCR), ngin iaid bad ngin bud katkum ka kyndon”la ong u Bah Egenstar.
U Bah Egenstar ula ong ba u Myntri Rangbah ka Jylla, u la kular ba ka Sorkar kan sa wanrah ia ka jingpynkylla ia ka MMMCR ban ai ad ia kiba tih maw tih shyiap da kaba rim khlem da pyndonkam ia ki mashin, ha kajuh ka por ka sorkar kan wanrah ia ka jingpynkylla ia ruh ia ka aiñ jong ka MMMCR.
U la ong ba baroh ki kali kiba kit maw kit shyiap kiba pynhap tang na shnong ha shnong, na kawei ka District sha kawei ka district bad hapoh ka nongbah jylla, kim donkam shuh ban iaid da ka challan laiit noh tang ia kiwei kiba leit ban leit maw shyiap shabar ka jylla ki donkam ia ka Challan.
