Shillong, Nailar 7: U President jong ka seng niam Hindu, ka Kumtumba Surakshya Parishad (KSP), u Satya Ranjan Borah u la byrthen ban pakhang ia ki surok kiba rung sha ka jylla Meghalaya na Assam, hadien ka jingpynbna jong ka Dorbar Shnong Mawsynram ban nym shah ia ‘riew ngeit Hindu ban pynlong ia ka krem Mawjymbuin kum ka jaka lehniam ha ka 10 bad 11 tarik mynta u bnai Nailar, hynrei ba kan dei beit thik tang ka jaka jngohkai pyrthei.
Kumban shu kdew, katei ka jingshim rai jong ka Dorbar Shnong Mawsynram ban nym ailad ia kino kino ki kynhun ban pynlong ia ka krem Mawjymbuin kum kata ka jaka lehniam, ka la ioh ia ka jingkyrshan na kiba bun ki seng, ki nongialam ba kynthup ruh wat na u Bah Paul Lyngdoh, Myntri jong ka sorkar jylla.
Utei u nongialam ka KSP haba kren sha ki lad pathai ha na nongbah Guwahati, u la ong ba kum ka seng, ka donkam ban ioh ia ka jubab na ki bor sorkar ka jylla Meghalaya halor katei ka rai kaba la shim da ka Dorbar Shnong Mawsynram, lem kumta na ka liang ka seng ka pynlong ia ka jingiakhih ha ka jylla Assam da kaba pakhang ia ka surok ban rung sha ka jylla Meghalaya, kum na Jorabat, Paikan bad kiwei kiwei de ki surok.
Utei u nongialang katei ka seng Hindu, u la kyntu ia ki bor sorkar ka jylla Meghalaya ba kidei ban weng mardor ia katei ka jingpynmih hukum ka Dorbar Shnong Mawsynram, namar kadei ka jaka kaba ki paid ‘riewngeit Hindu ki ju leit ban lehniam shisien shisnem ha katei ka jaka kaba la tip kum u bnai ka Shraban kaba la ju rakhe ha ki bnai Naitung bad Nailar manla u snem.
U Satya Ranjan Borah u la ong ruh ba ka jingleit lehniam jong ki Hindu ha katei ka krem Mawjymbuin kadei namar ba ka don ia u maw uba wandur long thik kum uta u Shiva Linga, uba ki paid ‘riewngeit jong ka Hindu kida khein kyrpang bad kyntang.
Shuh shuh, utei u nongialam niam Hindu, u la kynnoh ruh ba katei ka jingkhang ia ki ‘riew ngeit Hindu ban lehniam hapoh katei ka krem Mawjymbuin kadei kaba la leh da ki Khristan bad ki seng bapher bapher, kumba ka jylla Meghalaya kadei kaba bun paid da ki Khristan bad kaba la synshar da ki Missionary
