Kum u Nongmihkhmat paidbah na Mawhati Constituency bad uba dei ruh u President ka Managing Committee ka Nongjri Presbyterian Secondary School ha Ri Bhoi District, u Bah Charles Marngar da lade u la leit shaw hi ia ka kynhun ialehkai ka Nongjri Presbyterian Secondary School, kaba dei hadien ba ka la wan phai sha ka jylla ryngka ka nam lahduh jong ka under-15 ka International Surbroto Cup 2024 ha Bengaluru.
Ka kynhun ialehkai ka Nongjri Presbyterian Secondary School, ka dei ka kynhun kaba mihkhmat ïa ka jylla Meghalaya sha ka International Subroto Cup 2024 bad kane ka kynhun ka la ioh ban rah ia ka nam laduh, ka dei ha ka jingiakhun phainal ha ka 28 tarik u Nailar 2024 da kaba ka la pynliem lyndang ia ka kynhun ialehkai na Uttar Pradesh da 3-0 kol.
Da ka mynsiem jong ka jingsarong bad bad ka jingkmen u Bah Charles Marngar ha ka sngi thohdieng u la hiar da lade sha Airport Guwahati ban pdiang burom ia katei ka kynhun, kaba la wan phai noh sha ka jylla ryngkat ka nam lahduh katei ka lympung ialehkai baheh ha ka ri.
U la ong ruh kane ka jingjop kane ka kynhun, ka da long shisha ka burom ia u kum u nongmihkhmat bad ia ka skul bad ka burom ka leit ruh sha ka Ri Bhoi district bad ka jylla hi baroh kawei.
Kum u MLA bad President ka Managing Committee katei ka skul, u Bah Charles Marngar u la ai khublei naduh ki bor pyniaid skul, ki nonghikai, ki khynnah skul bad kumju h ruh ia ka Kong Kynjaisi Sylliang kaba don ïa ka Na Rympeit Youth welfare Organization Football Academy, ha kaba la ioh ban pyntbit ïa ki rangïalehkai kane ka kynhun bad dei lyngba ka jingiatrei lang na baroh ki liang kane ka kynhun ka la ioh ban rah ia ka nam lahduh katei ka International Subroto Cup 2024.
Shuh shuh, ula shi kabu ruh ban ai khhublei kyrpang ia kane ka kynhun kaba la lah shisha ban wan rah ia ka nam bad ka burom kaba dei lyngba ka jingialehkai bha kane ka kynhun. Ha kawei ka bynta, u la ai khublei kyrpang ruh naduh ka Directorate of Sport and Youth Affairs, ka ophis u District Sport Officer, ki nonghikai bad ki bor pynïaid ka skul kiba la ïa trei lang ban kyntiew ïa kane ka kynhun shaduh ka thong ba kan ioh rah ïa ka nam lahduh ka International Subroto Cup 2024 ha Bengaluru.
Da kaba ai khublei kyrpang ruh ia u Myntri ka jylla u Conrad K. Sangma, uba la kloi ban kyrshan bad ai mynsiem ia kane ka kynhun bad khatam ka jingshim khia ban pynlut ia ki jinglut jingsep haba ki la wan phai sha ka jylla, kaba dei lyngba ka jingkyrshan ka sorkar jylla bad u Myntri rangbah ba kum u nongmihkhmat u khmih lynti ba ka sorkar kan dang phai khmat sha kane ka kynhun kaba long shi bynta ban ai mynsiem ia ki samla ba kin dang kiew shaphrang ha ki kam ialehkai sport, u la bynrap.
