Halor ki kynrum kynram kaba la mih ha ka jingleit ban pom naphang ka KHADC na Lailad Beat ia ki jingthung jingtep jong ki katto katne ngut ki nongshong shnong ka Umladoh, Ribhoi District kaba la jia myn haka 3 tarik Nailar, Mynta ka sngi naka Ki Bor ka Khasi Hills Autonomous District Council (KHADC) hapoh ka jingialam ka Kong Magdalene S Mawlong kum ka Executive Member Incharge Forest ha ryngkat ki ophisar naka tnad Forest ka la hiar sha katei ka Shnong ban la leit ban ïa kynduh ïaki briew Shnong Umladoh ban ïa pynbeit ïa katei ka kam.
Ha katei ka jingïalang la ïa donlang ruh da u MDC ka Nongpoh bah Balajied Rani, bah Tenny Saiborne CFO, bah Kampher Kharsati, Incharge Ri Bhoi District, bah Lad Syngkli Rangbah Shnong Umladoh, bah Speshon Sylliang, Lyngdoh Raid Sohkhwai lem bad ki paidbah jong ka Shnong Umladoh.
Katei ka jingïalang kaba la long mynta ka sngi haka Shnong Umladoh ka long ban ïa mir jingmut lang ba kumno yn ïa pynbeit naka bynta ki longkmie kiba la shah pynjulor ki jingthung jingtep, ha kaba la don ka jingïa tai ñia halor katei ka jingjia ha kaba ki nongshong shnong ki la dawa ruh ba ki bor ka KHADC ki dei ban siew ia ka bailutksan namar ki jingshah pynjulor jong ki jingthung jingtep
Haba kren naka liang ka Kong Magdalyne S Mawlong kum ka EM incharge Forest,ka pynsngew ka naka liang ka District Council ka don ïaka jingsngew khia halor kaei kaba la jia ha ki sngi ki ba la leit noh hakaba ka la pynsngew ruh ba Kum ka council ka don ïaka iktiar ban ïada ïa u pud u sam jong ka KHADC bad kane ka jing leit jong ki haka shnong Umladoh ka long ban ïa kynduh ïaki nongshong shnong bad ban iatrei lang bad ban wan rah ïaka jingsngewthuh jingmut khnang ba kan nym don kano kano ka jingsngewthuh bakla.
Shuh shuh ka la pynpaw, halor ka jingdawa jong ki paidbah ïaka jingduh nong naka jingshah pynjulor ki jingthung jingtep, Naka liang ka EM kan sa rah ïa kane ka mat ha khmat u Chief Excecutive Member ka KHADC u bah Pynïaid Sing Syiem. bad ka la ong ruh ba kan sa shim ïa kane kum ka mat kaba kongsan eh hakaba kan sa ïa tai haka jingïalang jong ka Council ka ban sa wan.
Ka Kong Macdalyne ka la kyrpad ruh ïaki paidbah nongshong shnong ba kim dei shuh ban kyntur ne ban rep ban riang hapoh katei ka jaka ban lait na kino kino ki kynrum kynram.
U Bah Balajied Rani kum u MDC ka Nongpoh Konstituensi u la pynpaw ïaka jingsngew nguh ïaka Kong Macdalyne S Mawlong kum ka incharge jong ka Forest ka la long kloi ban wan mih hi dalade ban shimkhia ïa kane ka kynrum kynram haka Shnong Umladoh hakaba ka la ïoh ban ïa kynduh markhmat ïaki briew Shnong lem bad ki nongkitkam Shnong.
U la pynpaw ruh ba kum i MDC u don ïaka jingkyrmen ba ka EM incharge ïaka forest kan sa shim khia ban pynsngew sha kiba halor ha kaba ïa dei bad ka jingdawa jong ki paidbah ka Shnong Umladoh, ha kajuh kapor u la kyrpad ruh ïaki Nongtrei ka District Council ba kin peit pyrman ïaki ja ka jong ka KHADC khnang ba kan nym don shuh kum kine ki jingjia bad ban lait ruh na kim kine ki kynrum kynram.
Haba kren naka liang u Lyngdoh ka Raid Sohkhwai, Bah Speshon Sohkhwai, u la ïathuh ba katei ka jaka ka dei hi jong ka KHADC naduh ki snem 2004,2005 bad 2006 hakaba la pynskhem ruh ïaka ha ryngkat ka jingmana ïa kino kino ki Shnong ba kim bit ban kyntur pud sha ki jaka jong ka Council, hynrei kane ka kynrum kynram ka la mih hi lyngba ka jingbym burom daki paidbah ka Umladoh ïa katei ka jingmana ba ym bit ban thung jingthung ne ban rep ban riang ha ki jaka jong ka Council.
U bah Shembok Mawphniang, Rangbah Shnong ka Umsohma u la ïathuh ba ka jingdon jong une u u incharge ka Lailad Beat bad ka Nongtrei shitom jong u lyngba ka plantation jong ka District Council ka la pynlong ïaki jaka jong ka Council ban rben bad ban jyrngam. Bad lyngba ka jingneh jong ki khlaw ka la pynlong ïaki ba bun tylli ki Shnong ban ïoh ïaka umbam umdih bad u la ïathuh ruh lyngba ka jingtreishitom jong utei u incharge la lah ruh ban tehlakam ïaki kam tuh dieng kiba ju jia man kapor ha kine ki plantation.
