Ka thma ktien kaba jur mynta ka sngi ka la mih hapdeng u heh pulit ophisar bad ki dkhot ka HNYF East Khasi Hills, kaba dei hadien ka jingleit pakhang lynti ki dkhot ka HNYF ia ki Kali kiba wan na shabar ka jylla ha ka shnong Umtyngngar.
Kumba la sakhi mynta ka sngi bun tylli ki Kali tourist kiba wan na shabar ki la shah khanglynti ha Umtyngar, kaba dei ka surokbah ban leit sha ka thain Sohra bad Dawki bad da ka jingkhang lynti ki dkhot ka HNYF ki ki kali ba wan na shabar ki la hap ban sangeh noh shipor khlem da ioh lad ban leit sha ki jaka kaba ki thmu ban leit.
Dei lyngba ka jingwan poi ba mardor ki bor pulit ka East Khasi Hills ban tehlakam ia katei ka jingpakhang lynti ki dkhot ka seng HNYF, ki kali kiba wan na shabar ka jylla ki la ioh lad biang ban iaid sha ki jaka kaba ki thmu ban leit, bad kaba dei ruh hadien ba la mih ka thma ktien hapdeng u heh pulit ophisar bad ki dkhot ka HNYF.
Ki dkhot ka HNYF ki la ieng pyrshah triang da ka jingthmu ban khang naphang ia ki Kali ba wan na shabar ka jylla bad na ka liang u heh pulit ophisar pat u la pyneh beit triang ban pynlait lut ia kitei ki Kali kaba la bat da ki dkhot ka HNYF.
