Ka seng Federation of Khasi Jaintia and Garop People jong ka Western Zone ha Ri Bhoi mynta ka sngi ka la pynpaw ia ka jingsngewkhia halor ki jingeh jong kiba bun tylli ki shnong ha ka leit ka wan, kaba dei na ka daw ka jingbym pat biang ki surok kaba ki jynjar ha ka pang ka shitom bad ha ka leit ka wan na ka jingbym don kata ka surok kaba paka ban ai da ka sorkar.
Haba ia kren bad ki Nongthoh Khubor mynta ka sngi, u Vice president ka FKJGP, Western Zone ha Ri Bhoi District u Bah Alfred Lyngdoh, u la ong ba ka daw kaba la pynlong ia ka seng ban kan sngewkhia halor kane ka phang, ka dei namar ba bun ki nongshong shnong ki la pynpaw ia ka jingsngewkhia jongki, halor ka jingbym ioh ia ki surok ba bit ba biang bad kaba la pynsyrtok ia ki ha ka leit ka wan.
U la iathuh ruh ba ki shnong kiba la pynsngew sha ka seng halor ka jingeh na ka jingbym don surok ki kynthup ia ka surok ba pyniasoh sha Belahari, Rajakhumai, Nongkynrih, Jalilum, Ummar bad ka Nongwah Mawtamur.
Shuh shuh, na ka liang ka seng halor kitei ki jingeh ba la pynpaw da ki nongshong shnong, ka seng ka kyrpad jur naduh ki nongmihkhmat ka Jirang Constituency bad ruh ka sorkar jylla lyngba ka tnad PWD ba in shi khia ha kaba thaw ia ki lad ki lynti ban wan rah noh da ki surok kiba bit ba biang, namar kum ki nongshong shnong ha ki shnong nongkyndong ki kynduh mawsiang shisha ha ka leit ka wan na ka daw ka jingbym don kata ka surok kaba paka ba la ai da ka sorkar jylla, u la bynrap.
