Ban pyrshah jur ia ka kyndon aiñ jong ka sorkar jylla ba la tip kum ka Meghalaya Minerals Concession Rules 2016 (Triple MCR), na ka liang ka Joint Action Committee (JAC) ba la thaw hapdeng ki nongialam ka Stone and Crusher owner Association (S&COA) bad ka Quarry owner & worker Association (QO&WA) ki la rai ban sangeh ia ka jingtih maw bad shyiap ha ka jylla Meghalaya naduh ka 21 tarik u Nailar.
Haba pyntip halor kane ka rai, na ka liang u Bah D. Pyngrope, President ka JAC bad u Bah Mawkordor Khar Syiemlieh, General Secretary ka Seng ki Nongtih Maw bad Shyiap na West Khasi Hills District, ki la pyntip ba kum ka kynhun ki nongtih maw bad shyiap ha ka jylla Meghalaya ki la dep pynlong jingialang paidbah hapdeng ki briew kiba trei ia kane ka kam kiba kynthup naduh East Khasi Hills District, West Khasi Hills District bad Eastern West ha ka 19 tarik Nailar ban ia kren bad ia phylliew jingmut halor ki jingeh ba ki la mad ba kane ka Triple MCR 2016.
Ki la iathuh ruh, ba ka JAC hi jong kine ki ar kynhun da leilei ngim pdiang ia kane ka kyndon aiñ ba la pynmih da ka Sorkar Jylla ban hap shim Challan halor ka kam ba ki trei bad da leilei ruh kim treh ban thied challan ban shalan ia u maw bad shyiap namar ngim dei kiba shalan shabar ka jylla, hynrei ki dei kiba shalan tang hapoh ka jylla Meghalaya ia kine ki mar.
Ki la ong ruhzm, ba kum ka kynhun kiba trei ia ka kam tih maw bad shyiap ki mad jingeh shikatdei ban bud ia katei ka ain jong ka tripple MCR 2016, bad ngi dawa na ka sorkar jylla ba ka dei ban weng mardor ia kane ka aiñ bad lada ka sorkar jylla kam sngap ia ka jingkyrpad halor kane ka aiñ, na ka liang ki dkhot ka JAC kim banse ban boycott ia ka MDC election.
Shuh shuh ruh, ki la pyntip, ba kum ka dak ban pyrshah ia kane ka kyndon aiñ na ka liang ka JAC kan sangeh tih maw tih shyiap naduh ka 21 tarik Nailar bad kin pyneh beit traing tad haduh ba ka sorkar jylla kan shimkhia ban weng ia katei ka kyndon aiñ jong ka Triple MCR.
