Ha ryngkat ki ummat ka jingsngewsih bad ka jingbynnud halor ka jingkhlad noh u myntri rangbah barim ka jylla u Salseng C. Marak uba la khlad noh ha ka 16 tarik u Nailar 2024 ha Civil Hospital Tura, Na ka liang kiba haing hasem, ki lok ki jor bad na ka liang ka sorkar jylla mynta ka sngi ki la leh burom ba pyndep ia ka jingtep don burom ia ka met ba dang sah jong une u nongialam ka jylla.
Ia ka jingleh burom ia ka met ba dang sah jong u, la pynlong ha Resubelpara Mini Stadium. U myntri rangbah ka jylla Meghalaya u Conrad K. Sangma u la leit ban shim bynta lang kum ka dak ka jingsngewlem halor kane ka jingduh noh ia une u nongialam uba la noh synniang shibun eh ban kyntiew ia ka jylla Meghalaya.
Ha kane ka sngi, la leh burom ruh da ka ing ka sem, ki paidbah bad ka sorkar jylla ha kaba ki Pulit ka jylla ki la ai ia ka salute ban leh burom ia ka met ba dang sah jong une u myntri rangbah barim ka jylla, kata shuwa ban leit ban tep don burom ia u, ha ka lum jingtep jongka Gajingpara kaba don ha Resubelpara, North Garo Hills
Ha kane ka sngi, nalor ka jingdon ryngkat u myntri rangbah ka jylla, u Conrad K. Sangma ban sngewlmem haror ka jingduh noh ia une u nongialam ka jylla, kiwei kiwei kiba la ia don lang ki kynthup naduh u MP ka Tura, u Saleng A. Sangma, u Dr. Mukul Sangma, ki myntri sorkar, ki MLA na rilum Garo, ki heh ki hain jong ka jylla bad da ki hajar ngut ki paidbah kiba la wan ban sngewlem ha kaba leit tep don burom ia ka met jong une u myntri rangbah barim ka jylla.
Ki nongkren ha kane ka sngi, naduh u myntri rangbah ka jylla, u Conrad K. Sangma, u Saleng A. Sangma, MP ka Tura bad kiwei kiwei kiba ai jingkren, ki la pynpaw ia ka jingduhnong kaba khraw halor ka jingkhlad noh une u rangbah nongialam bad kum ki nongialam ki la pynpaw ruh ia ka jingsngewlem sha kiba haing ha sem bad kiba ieit bathoin kiba la duh noh ia une u rangbah nongialam.
Ki la pynpaw ruh wat lada um don shuh ha sla jong kane ka pyrthei, hynrei ki matti kiba u la buh ban kyntiew ia ka jylla Meghalaya kin iaisah junom bad kin iaid burom ia u kum u nongialam uba la leh shibun ki kam kiba khraw ha rilum Garo bad ha ka jylla Meghalaya hi baroh kawei.
