U Myntri Rangbah ka Jylla, U Conrad K Sangma haba kren sha ki lad pathai khubor mynta ka sngi, u la iathuh ba ka tnad pulit ka jylla ki la dep ban ujor haduh saw tylli ki ejahar kiba iadei bad ka jingshna ia ka khyrdop Inner Line Permit, ka jingkhynra beain ia ki kot ki sla jong ki nongtrei bar jylla ha kine ki khyndiat sngi ba lah dep pyrshah ia ki seng.
Haba kaba iadei bad ka Work Permit, u Conrad K Sangma u la ong ba kam ju don satia kum kata ka Work Permit. Ka don ka bynta ban pynrung kyrteng lane registration kaba la leh da ka tnad Labour bad kadei tang ka mat treikam kaba ka jylla ka bud ban pyntreikam.
U Conrad K Sangma u la iathuh ruh ba ym don mano mano kiba don bor ban leit khynra ne talasi ia ki kot ki sla jong ki nongtrei bar jylla, bad ong ru ba ki kynhun kiba la leh ia kitei ki kam ha kine ki khyndiat, ki la leh pyrshah ia ka ain.
Ha kaba iadei bad ka jingkynnoh ka KSU ba ka sorkar jylla ka pynslem ban pyntreikam ia ka ILP bad MRSSA, u Conrad K Sangma u la jubab ba katei ka jingkylli kam dei satia ban mih, namar na ka liang ka sorkar jylla ka la dep ban passed ia ka resolution hapoh ka ka Ïing Dorbar Thawain ban kyntu ia ka sorkar pdeng ba kan pyntreikam ia ka ILP ha ka jylla, hynrei haduh mynta, ka sorkar pdeng kam pat shim rai satia halor kane ka bynta.
Ha kaba iadei pat bad ka MRSSA, u Conrad k Sangma u la iathuh hadien ba ka jylla ka la dep ban passed hapoh ka Ïing Dorbar Thawain, hynrei la pynbeit biang ia ki kyndon bad na ka liang u Governor, u la phah ia kane ka tnad Home Affairs (MHA) ka sorkar pdeng ban khmih bniah. U la pyntip ruh ba na ka liang ka MHA jong ka sorkar pdeng, ka la phah biang sha ka sorkar jylla bad bthah ban khmih bniah biang sa shisien. Kumta ka jingkylli ban pyntreikam ia ka MRSSA ruh kam dei satia ban mih, la bynrap.
