Kum ka jingpyrshah halor ka jingkiew dor palat ki marbam mardih ne ki mar ki mata hapoh ka jylla, ka Paty Voice of the people Party (VPP) mynta ka sngi ka la pynlong ia ka jingshong kyllainmongor ha Madan Malki, Shillong na ka bynta ban pynpaw ia ka jingpyrshah halor ka jingshah ktah ki paidbah ka jylla na ka daw ka jingkiew dor ki mar ki mata.
Kum ban pynkynmaw, ka party VPP ka la rah ruh ia kane ka mat ha ing dorbar thaw ain ka jylla, hynrei kam shym la ioh ban ia thir na ia tai sani bad kum ka party ka la shim ruh ia kane ka rai ban pynlong ia kane ka jingshong kyllainmorngor ha Madan Malki na ka daw ka jingbym hun halor ka jingbym ioh lad ban ia kren halor kane ka jingkiewdor palat ki marbam mardih.
Ha kane ka jingleit shongkyllainmongor ha Madan Malki la ialam hi da u President ba rangbah ka VPP bad uba dei ruh u MLA ka Nongkrem u Bah Ardent Miller Basaiawmoit bad la synrang lang ruh da ka jingdon lang kiwei ki nongialam ka party bad ki riew paidbah.
Na ka liang u Bah Ardent Miller Basaiawmoit kum u President ba rangbah ka VPP u la ai jingkren ha kane ka sngi, ha kaba ka daw kaba la pynlong ia kane ka jingshongkyllainmongor ka dei halor ka jingsngewkhia halor ka jingkiew dor palat ki marbam mardih kiba la ktah ia ki paidbah bad khamtam ia ki longing baduk ba kyrduh hapoh ka jylla.
U la ong ai ruh da ka nuksa ruh kum ka doh masi ha Dimapur dang ioh 300 shi kilo bad ha Meghalaya kan poi haduh 500-600 shi kilo bad ruh ka doh Masi ka khap tad ha Mizoram bad Assam, ha kaba kine baroh ki jia dei namar ba don ka daw ba ha ka jylla Meghalaya la bun palat kita ki khyrdop khrong khrajna, ha kaba ka sorkar ka la shu kynnoh beit ba ym don kata ka surok rel.
U la bynrap ruh da kaba ong, haba phai sha baroh ki liang ki paidbah ki shah ktah khatam ki nongrep ia ka dor ka mur jong ki mar rep la shuh shah khniot dor ha iew ha hat bad kine ki kam ka dei ban don ka jingkitkhlieh da ka sorkar, namar lada ki nongrep ki shah ktah ngin shah ktah ha baroh ki liang.
Kumba la pynpaw da u Bah Ardent Miller Basaiawmoit, ka sorkar ka hap ban shim ia ka jingkitkhlieh halor kane ka jingkiewdor ki marbam ki mardih bad na ka liang ka party VPP kan nym shongkli kti bad kan ieng ban pyrshah lada ki marbam ki mardih ki dang kiew dor ha ka jylla, ba kum ka party kam kwah ba ki duk ki rangli kin shah ktah na kane ka jingkiewdor palat ki barbam mardih.
