Ki nongshong shnong jong ka shnong Umroi Madan mynta ka sngi kila leit ban ujor syndon sha u Deputy Commissioner ka Ri Bhoi ban pyrshah halor ka jingthmu ka sorkar ban pynkynriah iaka jingiaid lynti ka surok 4-lane ban sa shna naduh Umiam shaduh Malidor.
Ha ka jingkynduh ia u Deputy Commissioner ka Ri Bhoi, ki nongshong shnong ka Umroi Madan ki la aiti ruh da ka dorkhas sha u Deputy Commissioner ka Ri Bhoi, ban pynsngew ia u halor ki mat kiba ktah ia ki paidbah nongshong shnong namar ki jaka kaba ki pyniaid ia katei ka surok 4-lane kan sa ktah ia ka tyllong umbam umdih jong katei ka shnong.
Haba kren sha ki lad pathai khubor hadien ka jingiakynduh ia u Abhilash Baranwal u Deputy Commissioner ka Ri Bhoi mynta ka sngi ha Nongpoh u Bah CL Masharing bad u Bah T Marbaniang haka jingdon lang kiwei kiwei ki nongshong shnong ka Umroi Madan, ha kawei ka bynta kila pynpaw ka jingsngewkmen halor ka jingthmu ka sorkar ban shna ia kane ka surok 4-lane na Umiam sha Malidor, hynrei ki la pynpaw pat ka jingsngewsih namar katkum ka jingtip ba ki la ioh lum na ka liang ka sorkar kala pynkynriah iaka jingiaid lynti jong kane ka surok sha ki ranap lum kiba hap hapoh u pud u sam ka shnong Umroi Madan, ka ba dei ruh ka jaka ba don ka tyllong umbam umdih kaba la pyniasyriem kum ka jingim jong ki nongshong shnong katei ka shnong.
Na ka liang kitei ki nongshong shnong ki la pynpaw ruh ba ka sorkar ka dei ban pyniaid beit na ka surok Shillong by-pass kaba la don lypa na ka bynta ban shna ia kane ka suork 4-lane bad lada ki pyniaid na kane ka juh ka surok ba la don lypa kan nym don jingktah ia ki paidbah nongshong shnong ka Umroi Madan.
Shuh shuh, kine ki nongialam bad ki nongshong shnong ki la pynpaw ruh ka jingsngewkmen hadien ba la kynduh ia u deputy commissioner ka Ri Bhoi, kaba dei halor ka jingkular jong u ban shim khia ban ia kren bad ka tnad Revenue khnang ban lah ban pynbeit ia kitei ki jingdawa jong ki nongshong shnong shnong.
