Nongpoh, Risaw 24: Ka Confederation of Ri Bhoi People (CoRP) lyngba ka kyrwoh kaba la phah da u Bah Bandari Ryntathiang, President rangbah ka seng, ka la phah ia ka khubor ban ai ka jingiaroh ia u Bah Rayonald Kharkamni, President Ri Bhoi District Cricket Association (RBDCA) bad uba long ruh kum u Vice-President ka Meghalaya Cricket Association (MCA), uba la shah jied ha ka Board of Control for Cricket in India (BCCI) ba un long kum u Match Observer ha ka jingialehkai Test ka ban long hapdeng ka India pyrshah ia ka New Zealand, ka ban long ha Wankhede Cricket Stadium ha Mumbai, ka ban sdang ha ka 1 tarik haduh 5 tarik jong u bnai Naiwieng.
Ha ka kyrwoh ba utei u nongialam ka CoRP, u la phah sha ki lad pathaikhubor, la pynpaw ba ka CoRP, ka sngewsarong ban iohi ba ki samla rangbah na ka dong ka thain, ba kin kynjoh sha katei ka thong, ba kat ka BCCI kan peit khmat bad ba kan jied ia u ba un long kum uta u Match Observer ha katei ka jingialehkai Test hapdeng ka India pyrshah ia ka New Zealand.
Nalor ba ka la ai ia ka jingkhublei kaba kyrpang, ka CoRP ka la ai ruh ka jingiaroh ia u Rayonald Kharkamni, namar ba u la trei shitom haba iadei bad ka jingkyntiew ia ka kam lehkai Kriket, la la long ha Ri Bhoi bad ha ka jylla hi baroh kawei, ha kaba kum ka seng ka sngew ruh ba kiba kum kitei ki samla rangbah, ba kin dang iai mih nangne shakhmat ba kin long kum kita ki nongialam.
Kum ban shu kdew, ba ban long kum ki Match Observer ha ka jingialehkai Kriket, ka long ba ki dei ban phah ia baroh ki kaiphod, kiba iadei naduh halor ka jinglong jingmang ki madan ialehkai, ki nongpyniaid ia ka jingialehkai (Umpire), ki kam kiba iadei bad ki rang ialehkai lem bad kiwei kiwei ki jingdonkam hapoh ka jingialehkai.
