Ki nongialam ka Ri Bhoi District Criket Association (RBDCA), ki la pynbna paidbah ba kin pynlong ia kawei ka prokram kaba la tip kum ka ‘Talent Hunt’ ne ban wad ia kito ki khynnah kynthei bad kiba donsap shisha ha ka kam ialehkai Kriket.
Ia katei ka prokram ba ka RBDCA ka la pynlong, ka dei ba ki la iatreilang bad ka Seng Samla Shnong Umran Niangbyrnai, ha kaba kin sa pynlong ha ka 26 tarik mynta u bnai ha Madan ialehkai ka shnong Umran Niangbyrnai.
Ki khynnah kiba la don ha ka rta kaba 10 snem haduh 16 snem bad kiba don jingmut ne angnud ban long kum kita ki rang ne thei ialehkai Kriket, ki lah ban leit iashimbynta ha katei ka ‘Talent Hunt’ kaba la pynlong da ka RBDCA, ha kaba lada lap ba ki donsap shisha, kin sa shah jied bad ban ioh ia ka jingshah hikai ba kham janai shuh shuh.
Ka por ba sdang jong katei ka ‘Talent Hunt’ kan sdang naduh ka por 9 baje mynstep, ha kaba kin sa don ki Coach ne ki ban sa jied ia ki khynnah kiba don ia kata ka sap ha ka kam ielehkai Kriket.
