U P.P Yadav, uba long kum u Block Mission Coordinator (BMC) ka Samagra Shiksha Abhiyan ha Umling Block Resource Centre, u la hap ban panmap da ka ktien bad kumjuh ruh lyngba ka jingthoh sha kawei ka longkmie, kaba trei ha ophis BMC SSA Umling Block kaba don ha Nongpoh, Ri Bhoi.
Katei ka jingpanmap P.P Yadav ia katei ka longkmie, ka dei hadien ba ki nongialam ka Federation of Khasi Jaintia & Garo People (FKJGP) Ri Bhoi, kiba kynthup ia u Bah Shanlang Diengdoh, General Secretary bad u Bah Gabriel Sun, Education Secretary ka FKJGP ha Ri Bhoi, ki la leit ban kynduh markhmat ia utei u BMC bad ha ka jingiakren, kitei ki nongialam ka FKJGP, ki la dawa na u P.P Yadav, ba u dei ban panmad mardor na katei ka longkmie, kata ka long lyngba ka ktien bad ka shithi panmap ruh kumjuh, ha kaba kut u P.P Yadav, u la hap ban pyndem ialade bad uba la kohnguh ia kaba la dawa da kitei ki nongialam ka FKJGP.
Haba kren sha ki lad pathaikhubor, u Bah Shanlang Diengdoh, u la ong ba ha ka jingkren jong ki bad u P.P Yadav, ki la ioh ban kren halor shibun ki mat bad kata ka long naduh ka jingujor kaba ki la ioh ia ki nongtrei hapoh katei ka ophis bad kumjuh halor ka jingujor kaba ki la ioh, ba utei u BMC, u ju shim pisa na ki nongpyniaid ha ki skul, haba ki kwah ban ioh ia kino kino ki kam pynroi hapoh ka skul, kaba kynthup naduh ki kam ba pynhep ia ki kam klass, ki jaka leit shabar lem bad kiwei ki jingdonkam ha ki skul.
Ka seng kam kwah ba kiba kum kitei ki ophisar kin don hapoh ka Distrik, namar ba um burom ia ki nongtrei kiba kham hapoh ia u, ka seng namarkata ka kwah ba u P.P Yadav ba un mih noh ha Ri Bhoi, namar kumba la ioh jingtip da ka seng, la ong ba utei u briew, u dei uba la shah beh beit na kat ki jaka ba u trei, namar ki kam kiba u trei ki dei kiba ym sngew iahap ia kiba bun bad halor kane ka mat, ka seng kan sa kynduh ruh ia ki bor ba halor bad ba kin buddien beit ia katei ka kam.
