Haba ai jingkren sha ki paidbah ha ka sngi ba u Bah Shakliar Warjri, uba dei u Myntri ki kam ialehkai ha ka jylla, u la leit ban iashimbynta ban pdiang burom ia ki rangialehkai ka Nongjri Presbyterian Secondary School ha shnong Nongjri, Umsning, u la kular ban pynioh ia kawei madan ialehkai Basketball ia katei ka skul, kaba la long kum ka nongjop ha ka U-15 International Subroto Cup 2024, ka lympung ialehkai phutbol kaba hehduh hapdeng ki skul ha India bad kaba la wan iashimbynta ruh da ki skul na ki ri kiba marjan.
U Bah Shakliar Warjri, u la ai ruh ka jingiaroh kaba kyrpang eh ia ki rangialehkai bad kumjuh ruh ia ki Coach bad ia kiwei kiba la leit ban synran ia kitei ki rangialehkai, tad haduh ba ki la jop syndon ha katei ka lympung ialehkai, kaba la long ruh ka jingsarong ym tang ia katei ka skul, hynrei ia ka Distrik bad ka jylla hi baroh kawei.
Ha katei ka sngi ba la pdiang burom ia kitei ki rangialehkai ka Nongjri Presbyterian SS, nalor ka jingdon u Myntri ki kam ialehkai, la sakhi ruh da ka jingdon Bah Charles Marngar, MLA/MDC ka Mawhati, u Bah Mayralborn Syiem MLA Nongpoh, u D.D Shira Director Sports & Youth Affairs, u Bah Bobby L Nongbet DSO Ri Bhoi District, ki nongkitkam ka Managing Committee jong ka Nongjri Presbyterian SS, ki nonghikai bad ki khynnah skul lem bad ki paidbah ka shnong Nongjri.
Shwa ba kitei ki rangiehkai kin poi ha Ri Bhoi, nyngkong la pdiang burom nyngkong da ki bor pyniaid Distrik ka Ri Bhoi, ia kaba ki la pdiang burom ha Circuit House Nongpoh, nangta sa ka seng KSU kaba la pdiang burom ha Indoor Stadium Umlyngkdait, hadien kata pat la pdiang burom ia ki sa ha Nongthymmai Umsniang da ka RBDSA bad kiba la pynlong ruh ia ka jingiaiaid paidbah haduh ban da poi ha Madan Nongjri bad kaba la pynlong ruh ia ka jingpynkup burom kaba kham kyrpang eh.
