Ka jingiakop niah kali ha ki khlaw ne ki surok ktieh ba khohruh khohram ba la tip kjum ka 6th AHOR 4X4 Off Road Challenge 2024, kaba dei ruh ka lumpung iakop ba la pynlongda ka Adventurous Hynniewtrep Off Roaders (AHOR) ka la kut noh ha ka sngi Saitjain ha Kharsati Park, kaba dei ruh da ka jingwan shim bynta ki nongñiah kali na kylleng ka jylla bad ruh na shbar ka jylla ha kaba ki la sei ia kita ki sap ki phong ban pynnih ia ka jingtbit jongki ha ka kam niah kali ha khlaw lyngba kita ki surok khohruh khohram.
Kane ka lympung ïakop ñiah kali kadei kaba la sdang naduh ka 10 tarik, Risaw bad la pynkut noh ha ka 12 tarik Risaw, ha kaba da ki hajar ngut ki paidbah nongpeitkai kila wan ban sakhi jong kane ka jingiakop niah kali bala pynïakhun haki 3 tylli ki kyrdan kata ka Stock Category, Modified Category bad Pro Modified Category.
U Bah MB Tongper ADC ka Ri-Bhoi u la wan ruh ban pynhap pyrda ia kane ka tamasa niah kali kum u kongsan, bad la sakhi lang ruh da ka jingdon lang u Bah Damian Umdor President ka AHOR, Bah Fedinand Jahrin Secretary, Bah Ferdinald Kharkamni Vice Preisdent bad kiwei kiwei ki dkhot jong kane ka kynhun.
Hab kren kum u kongsan u Bah M.B Tongper u la iaroh ia ka kynhun AHOR, kaba dei kawei na kynhun ba ju pynlong ia kane ka jingiakop niah kali sha khlaw bad kaba la khring ruh ia shibun ki riew ieit niah kali ha khlaw ban wan shim bynta ha kane ka lympung ym tang na ka jylla Meghalaya bad na kiwei kiwei ki jylla jong ka ri.
U la pynpaw ruh da kaba ong, ba kane ka lympung ia niah kali ha ki khlaw ne ki surok khohruh khohram ka iarap ban ioh shim bynta ki riew don sap bad ha kajuh ka por ruh kan khring ia ki nongjngohkai pyrthei, kaba dei ruh kawei na ka lad ban kyntiew ia ka ioh ka kot ki trai jylla lada wan poi ki briew kiba na shabar ka jylla. Kaba sngewmen ka long ba wat u myntri ka tnad Tourism u Bah Paul Lyngdoh u la kular ban pynrung noh ia kane ka jingiakop niah kali sha khlaw ha ka Calander ka tnad tourism kaba long ka jingkyrmen ban dang kyntiew ia ka kam jongohkai pyrthei ban myntoi ka ki paidbah bad ka jylla hi ba baroh kawei, u la bynrap.
Ki bor pynïaid kila sam ruh ïaki khusnam sha ki nongjop da ki trophy bad song pisa, ha kaba ki nongjop ha kane ka lympung na ka liang ki kynthei la rah da ka Philita Syiem Markynti Warjri ïaka nam lahduh, haka Stock Caterory la rah da u Rashid Mukhim bad Banker Khongwir, haka Semi Modified la rah da u Cameo Lawai bad Freddy Mawrie bad haka Pro Modified la rah da u Mehboob K Shafi C.K.
Shuh shuh, la sam ruh ia ki khunsam kyrpang ba kynthup Best Driver Stock Category bala ioh rah da u Azrel Balamang Dkhar, Best Co-Driver Stock Category-Barong Umdor, Best Driver Semi Modified Category- Albinus H.L. Laskor, Best Co-Driver Semi Modified Category-Wellhing Son Warkhyllew, Best Driver Pro Modified Category-Mehboob K, bad Best Co-Driver Promodified Category-Elrus Syngkli.
