Ka kmie, u kpa bad ka khun ki la lait salit na ka jingjia ba sngewsih, kaba dei hadien ka jingtwa khyndew ha ka shnong Sangbangla ba don harud ka surokbah National Highway-6 ha Ri Bhoi, ba ka khyndew ki siej ki la ban syndon ia ka dukan bad ka ing kaba ki shong harud kane ka surokbah.
Kane ka jingjia ka la jia hynnin ka janmiet ha ka por 8 baje ei ei mynmiet, kaba dei hadien ka jingther u lapbah ba la neh kumba 3 kynta ei ei, kaba la pynlong ruh ia ka khyndew ban twa bad ban ban ia katei ka dukan bad ka ingsah jongki.
Kane ka longing ba shah ktah ha kane ka jingjia, ka dei ka longing jong u Bah Teiborlang Wahlang ha ka Shnong Shangbangla. Ha kane ka jingjia ki la duh lut ki jingdon jingem naduh ki tiar ki tar, ki soh ki pai bad kiwei kiwei ki mar ba die ha katei ka dukan.
Kumba la iathuh ruh da u Bah Bishos Lawriniang, Rangbah Shnong ka Shnong Shangbala la ong ba donbok ba ym don kano kano ka jingjia ba sngewsih, ha kaba la shu julor noh tang ka ing bad ki dukan ryngkat ki tiar ki tar bad kane ka jingjia ka dei hi na ka jingther u lapbah hynnin ka janmiet, u la ong.
U la iathuh ruh ha ka shnong Shangbangla ki don kumba 20 tylli ki longing kiba don hapdeng ka jingma kaba lah ban ktah na ka jingtwa khyndew haruhd ka surokbah bad u buh ruh ka jingkyrpad ia ka sorkar ba kan thaw ia ki lad ki lynti ban iada bad ban lait na kino kino ki jingjia ba sngewsih.
