Ki bor pulit ka State Disaster Response Force ka jylla mynta ka sngi, ki la ioh ban sei noh ia ka met iap jong uwei u heprit uba la jah klep bad suba ngam jyllop ha ka wah Umiam marjan bad ka shnong Nonglum Mawiong ha Ri Bhoi District.
Ia katei ka jingjia, na ka liang ki bor pulit ka Ri Bhoi, ki la pyrshang ban wad ia ka met jong utei u heprit naduh hynnin ka sngi, hynrei ki khlem lap satia, kumta ki la kyrpad ia ki bor pulit ka SDRF jong ka East Khasi Hills District ban pynlong ia ka jingwad ia ka met jong utei u heprit.
Ka kynhun jong ka SDRF kaba la lam khmat da u Bah Transly Tynsong ka la sdang ia ka jingwad ia ka met jong utei heprit ha ka por kumba 10:30 baje mynstep bad tang hadien kumba 15 minit eiei, la ioh ioh ban sei noh ia ka met jong utei u heprit uba la tip kyrteng kum u Biki Makri, khun jong ka Kong Jantilin Makri na ka shnong Nonglum Mawiong.
Ia ka met kaba sah jong utei u heprit la aiti noh sha ki bor pulit ka Ri Bhoi District na ka bynta ban pyndep ia ki jingdonkam katkum ki kyndon ain bad hadien kata la aiti noh sha ki bahaing hasem na ka bynta ban pyndep ia ka jinglehniam khatduh.
