Ka sorkar Meghalaya bad ka sorkar Assam, ki la rai ban thung noh da ka Joint Committee na ka bynta ban ia bishar bniah halor ki mat kiba ia dei bad ka skulbah University of Science and Technology, Meghalaya kaba don ha Baridua, Khanapra ha Ri Bhoi District.
Haba kren sha ki lad pathai khubor, u Myntri rangbah ka jylla Meghalaya, u Conrad K. Sangma u la ong, “ ba u Myntri rangbah ka Assam bad ma u kum u myntri rangbah ka Meghalaya ha ka jingshu ia kren ktien ki la ia rai lang ban thung da ka Joint Committee, ha kaba ki bor nongmihkhmat ka sorkar na Meghalaya bad Assam kin ia don lang na ka bynta ban ia thir na ia tai sani halor shibun ki mat ba la shah kynnoh ne pyrshah jur da ka Assam bad kiwei kiwei”.
U la ong ruh ba ki chief secretary na baroh ar tylli ki jylla la dep ia kren ba kin thaw ia ka committee bad baroh ki mat kiba long pyrshah ia ka skulbah USTM kin ia kren ha kane ka Committee bad kyrmen skhem ruh ba lyngba kane ka Committee kin lah ban ia pynbeit noh ia kino kino ki mat kiba long pyrshah ia katei ka skulbah.
Haba jubab ia ka jingkylli, u Myntri rangbah ka jylla u Conrad K. Sangma u la ong ba ka sorkar ka la ioh pdiang ia ka jingrakren kaba thikna halor kane ka mat, kaba dei hadien ka jingiakren bad u myntri rangbah ka Assam. U kyrmen skhem ba ha kane ka taiew ban sa wan ka Committee kan shim khia ia kane ka kam na ka bynta ban ioh ban ia kren halor kita ki mat kiba long pyrshah ia ka USTM, u la bynrap.
