Nongpoh, Jymmang 13: U Bah Shakliar Warjri, Myntri ba dei peit ia ki kam ialehkai hapoh ka jylla, mynta ka sngi, u la hiar sha ka shnong Nongsder, kata ban leit buh ia u Mawnongrim, na bynta ban tei ia ka Madan ba siang phlang plastik ne ka Artificial Turf hapoh ka madan Nongsder.
Ha katei ka sngi ba la buh ia u Mawnongrim ban tei madan phlang plastik, la sakhi ruh da ka jingdon u Damanbait Lamare, MLA Umroi, u Bah D.P Wahlang, Chief Secretary ka sorkar jylla, u D.D Shira, Director of Sports & Youth Affairs, u Bah Jonas Lyndem, Rangbah Shnong Nongsder, ki riew rangbah ka thain lem bad ki paidbah jong ka shnong Nongsder.
Ia katei ka Madan phlang plastik ha Nongsder, ym sa shna janai bha bad ka jingpynmang pisa, ka long haduh T. 10 klur tam, kata naduh ban shna bha ia ka Madan, ki jaka khreh ba biang na bynta ki nongialehkai lem bad kiwei de ki jingdonkam.
Haba ai jingkren halor katei ka sngi buh Mawnongrim, u Bah Shakliar Warjri, u la ong ba ka jingurlong katei ka Madan Artificial Turf, ka dei na ka jingtrei shitom u MLA, hynrei lada ym dei na ka jingtrei shitom u MLA Umroi, kaba mut ba ka shnong Nongsder kam shym la ïoh satia ia katei ka Madan phlang plastik.
Katba na ka liang u MLA Umroi bad kumjuh ruh na u Bah D.P Wahlang, ki la ong ba ka jingioh madan Artificial Turf ka shnong Nongsder, kan da long shisha jingmyntoi kaba khraw eh na bynta ki khun samla ym tang na bynta ki samla ka shnong Nongsder, hynrei na bynta ki khun samla jong ki shnong kiba marjan bad ka Nongsder.
