Nongpoh, Naiwieng 18: Kum kawei na ka thong ban wad ia ki sap kyrpang ki samla kiba don sap ha ki kam ialehkai Cricket na ka District Ri Bhoi, ka Ri-Bhoi District Cricket Association (RBDCA) bad ryngkat ka jingiatrei lang ka Western Ri-Bhoi Sports Association ha ka sngi Saitjain ka la pynlong ia kawei na ka prokram ba la tip kum ka ‘Talent Hunt’ ha Madan Umsaw, Patharkhmah ba hap ha Western Ri Bhoi.
Ha kane ka prokram wad bniah ia ki sap ialehkai Cricket ki samla kynthei bad shynrang la wan poi haduh 24 ngut ki samla shynrang bad 3 ngut ki samla kynthei kiba la ioh ia ka jingai jinghikai lyngba ka jingwad bniah da ki Coach ba kynthup ïa u Shanker Newar BCCI coach level 1, Badonnam Mylliemngap O level, Biswajit Das O level, Bharat Gurung 0 level.
Ha kane ka sngi la sakhi lang ruh da ka jingdon lang u Bah Rayonald Kharkamni President ka RBDCA, Bah Michael Kharhunai General Secretary, u Bah Ephnas Thangkhiew General secretary Western Ri Bhoi Sports Association bad kiwei kiwei ki nongkitkam jong ka RBDCA bad ruh ki nongialam ka Western Ri Bhoi Sports Association.
Kumba la pynpaw, ka jingthmu ka RBDCA ban pynlong ia kane ka talent hunt na ka bynta ki samla kynthei bad shynrang ka long ka jingkyrkhu ia ki samla don sap ha ka kam ialehkai Cricket, namar ka thong jong kane ka prokram ka long ban wad ia ki samla ba tbit ha ka kam ialehkai Cricket khnang ka Association kan dang lah ban kyntiew ia ki kam ialehkai Cricket, kaba dei kawei na ka jingialehkai kaba paw bad kaba ai jingmyntoi na ka bynta ki samla don sap.
