Shillong, Rymphang 16: Ha ka sngi sdang ka dorbar mang tyngka mynta ka sngi, u Myntri Rangbah ka jylla, u Conrad K. Sangma u la ong ba tang hapoh ka 6 bnai ka Judicial Inquiry Commission ba la thung da ka sorkar kan pyndep ia ka jingtohkit bad ba kan phah ia ka kaiphod sha ka sorkar, kaba dei halor ka jingbthei ka par dewiong ha Mynsngat-Thangkso  ba ki 30 ngut ki nongtrei ki la duh ia la ka jingim.

“Ka judicial Inquiry commission kan nym shim ia ka bynta tang ban tohkit halor katei ka jingbthei ka par dewiong beain kaba la jia ha ka 5 tarik u Rymphang 2026, hynrei kane ka Commission kan tohkit bniah ruh ia ka jingdon ki par dewiong beain bad ruh ban ban ai jingmut sha ka sorkar kaba de katkum ka Commission of Inquiry Act, 1952 ba la wan rah kane ka dorbar mang tyngka” ong u Conrad K. Sangma kaba dei katkum ka Suo-moto ba la ujor  halor katei ka jingjia ha ka sngi ba la sdang ka dorbar mang tyngka mynta ka sngi ka jylla.

U la pynpaw ruh ba ka  sorkar jylla la la dep ban leh da kaba tyngeh halor katei ka jingjia bad ka la pynthikna ruh ba ka jingtih dewiong beain bad ka jingshalan beain kam dei shuh ban dang bteng ha ka jylla khlem da ioh bor na ka sorkar.

U Myntri rangbah u la bynrap ruh ba ki bor synshar district kin pynthikna ruh ban pyntreikam ia ka jingtih dewiong katkum ka Scientific Mining na ka bynta ki 3 ngut kiba la ioh ia ka Scientific Mining  bad ka kyrteng ki 20 ngut ruh la dep ban phah sha ka sorkar India ba shen kin sa ioh bor ban tih dewiong katkum ka Scientific Mining.

La thung ruh ia ka Judicial Inquiry Commission ha ka 14 tarik u Rymphang 2026 katkum ka Commission of Inquiry Act, 1952  bad ia kane ka Commission yn lam khmat da u Chief Justice barim ka Uttarakhand bad Telangana High Courts bad ryngkat 2 ngut ki dkhot ba kynthup ia u H Nongpluh IPS ba la shongthaid bad u Bah Peter Dkhar IAS ba la shongthaid.

Haba pynpaw ruh halor ka kamram jong ka Commission, u Conrad K. Sangma u la ong ba ka Commission kan pynlong ia ka jingtohkit kaba bniah halor katei ka jingjia kaba la mih na ka jingjia ha ka 5 tarik u Rymphang 2026 ha katei ka par dewiong kaba don ha Mynsngat-Thangsko, East Jaintia Hills bad bynrap ruh ba ka Commission kan phah ia ka kaiphod ba ka ioh lum na katei ka jingjia ba kum kine ki jingjia ba sngewsih kim dei shuh ban dang jia ha ki por ban sa wan.

Shuh shuh, u la bynrap ruh ba ka Commission kan ai jingmut ruh ia ki lad ki lynti ban sangeh ia ki jingtih dewiong beain, ka lad jingiarap lane ki kynja skhim na ka bynta kito ki briew kiba la shah ktah ka ja kpoh na ka jingkhang ka NGT ban tih dewiong bad ruh ban ai jingmut ba ka sorkar kan jylla kan pan jingiarap na ka President ka ri India ban pynjynsur ia ki kyndon jong ka Mines and Mineral Development Act, 1957 bad kiwei kiwei ki ain ba la pynlong ain da ka Parliament hapoh ka Para 12(A)(b) jong ka Sixth Schedule ka riti synshar ka ri lada donkam ban pynjynsur ruh ia ka rukom tih dewiong ba la ju leh da ki trai jylla hapoh ka jylla Meghalaya.